Aktualitatea

Nor da nor?

2015eko Juan San Martin bekea Etnologia ardatz hartuta

Juan San Martin Bekaren 2015eko edizioak Etnologia izango dau ikerketa esparru eta langai. Eskaerak eta ganerako agiriak Eibarko udalean aurkezteko epea 2015eko irailaren 1etik urriaren 9ra bitartean izango da.

Chillida eta bere garaikideak aztergai Frankfturten

Etxepare Euskal Institutuagaz batera eratutako Eduardo Chillida Katedrearen sorkuntzearen harira, Frankfurteko Goethe Universitätek eskultorea, euskal egilearen artelana eta bere garaikideak ardatz izango dituan nazinoarte mailako kongresua antolatu dau garagarrilaren 3tik eta 5era bitartean,

Gaztelugatxeko altxorra jagoten

Gaztelugatxeko kostaldea hondakinez garbitzeko boluntario jardunaldia egingo da garagarrilaren 4an, Lurgaia Fundazinoak eta Bermeoko Udalak antolatuta. Jarduerearen helburu nagusia itsasoak kalara ekarritako hondakin guztiak, botilak, kutxak, plastikoak, sareak eta sokak kentzea da.

'VII. Artistak Egoitzan' programarako lau proiektuak aurkeztu ditue

Idurre Azkue jantzari gipuzkoarrak Bailar por bailar proposamena aurrera eroan ahal izateko aurkeztutakoa; Idoia Zabaletaren, Tomas Aragayren eta Sofia Asencioren La naturaleza y su temblor performance ibilaldia; Macarena Recuerda artista bilbotarrak aurkeztu dauen MiCarteraPatrocina SC taldearen Collage lana eta, azkenik, Asier Zabaleta jantzari eta koreografo bilbotarraren Haritik zintzilik euskerazko lana dira aukeratutakoak.

Hemen dagoz 2015eko Letren Terrazak Getxon

Getxoko Letren Terrazak 2015, Getxoko Udako Liburutegiak, hain zuzen, garagarrilaren 1etik abuztuaren 28ra arte kaleratuko dira barriro be liburuak umeei zein helduei hurreratzeko. Aurreko urteetan legez, sei kokapenetan banatuko dira terrazak.

Gaur, hilak 29, hasiko dira Eibarko Udako Ikastaroak

Gaur, astelehena, bagilak 29, hasiko dira Eibarren Udako Ikastaroak. Jardun gurekin lemapean, 34 ikastaro eta 6 jardunaldi izango dira aurten Baiona, Eibar eta Iruñean.

LAB eta Steilas saritu ditu EHGAMek sexu askapenaren egunaren harira

Zoriontzeko lanen artean LAB eta STEILAS sindikatuak nabarmendu ditu aurten EHGAMek eta eurentzat izan da Urrezko hirukia. Lehenengoa, Genero eta aniztasun sexualerako Gida argitaratzeagaitik eta bigarrena Lantokietako bazterkeria eta jazarpen homofobikoaren aurkako protokoloa abiarazoteagaitik.

Julen Iriondok irabazi dau 2015eko Rikardo Arregi kazetaritza saria

Aurtengoa Goiena tokiko komunikabidean argitaratutako lan batentzat izan da: Julen Iriondo kazetaria izan da sariduna, hiesari eta Jon Salaberri hiesaren kontrako ekintzaileari buruz egindako idatzizko lanagaitik.

Klitto! feminismoaren inguruko aldizkari digital euskalduna jaio da

Klitto! atari digitalaren oinarri, bide eta helburua feminismoa da. Feminismoaren inguruko gaiak jorratuko ditue Klitto!-n, ikuspuntu feministeagaz interpretau eta lantzen dira albisteak, eta feminismoari ikusgarritasun eta irisgarritasun handiagoa emotea da helburua, euskera hutsean.

Gaizka Garitanok Bai Euskarari Laguna saria jasoko dau Donostian

Bai Euskarari Laguna saria Gaizka Garitano futbol entrenatzaileari emongo jako, azken urteotan, lidergo gaitasun sendoa erakusteagaitik eta hain mediatikoa dan futbolaren munduan euskeraz era koherentean jokatzeagaitik. Agerraldi publikoetan euskerea lehenesteko orduan sortzen diran zailtasunei aurre egiten jakin dau eta eredu bat eskaini deutso hiztun komunidadeari, nabarmendu dabe.

Borja Cobeagaren 'Negociador' filmaren kaleko emonaldia Bilboko Olabeaga auzoan

Kultura Sailak Negociador (2014, 80 min) filma eskainiko dau gaur, barikua, bagilak 26, Bilboko Olabeagako Udaltegian, Borja Cobeaga filmaren zuzendariagaz eta Ramon Barea antzezle protagonistearen presentziagaz. Gaueko 22:00etan hasiko dan aire zabaleko proiekzinoak aurkezpena eta amaitu ondorengo barriketalditxua izango ditu.

'Bizkaia Maitea' aldizkaria formatu digitalean irakurgai

Bizkaia Maitea Iraunkortasunerako Hezkuntzarako aldizkaria da eta Ingurumen Foru Sailak argitaratzen dau; aldizkariak daborduko hamarkada bi baino gehiago bete ditu, eta orain goitik behera barriztauta agiri da interneten; horretarako, formatu barriak erabili ditu, eta ikusteko eta konsultarako aukerak ugarituz eta erraztuz.

Labayru Fundazinoak esamolde eta lokuzinoak batu ditu Hiztegi Fraseologiko barrian

Gaztelaniazko 3.500 lokuzinotik gora dakarz Labayruren Hiztegi Fraseologikoak, hareen euskerazko ordainakaz batera. Eten barik barritzen joango dan tresnea izango da, on-line hiztegi batek emoten dituan abantailei esker. Labayruren hiztegiak konsultau ahal izateko, webgune barritua atondu dau Fundazinoak: hiztegia.labayru.eus