Aktualitatea

Elhuyarrek aro barri bati ekin deutso

Berrogei urteko ibilbidea eginda, aldaketak eginez hasi dau 2013a Elhuyarrek. Xedea eguneratu dabe, negozio-unidadeak egokitu, eta irudi korporatiboa aldatu. Ganera, Elhuyar Fundazioko lehendakaria eta zuzendari nagusi barria aurkeztu ditue, Jose Mari Pitarke eta Leire Cancio, hurranez hurran.

Bilboko Alondigeak Arrazakeria eta Xenofobiaren Kontrako Nazinoarteko Eguna ospatzeko umeentzako jarduera bereziak antolatu ditu

Martiak 21, Arrazakeria eta Xenofobiaren Kontrako Nazinoarteko eguna modu ludiko eta gozagarrian ospatu nahi dau Bilboko Alondigako Mediateka BBK-k. Horretarako umeek eta familiek kulturaniztasuna egoera positibo eta aberasgarri lez ulertzea helburu daben jolas eta tailerrak antolatu ditue.

Jakinbai.eu Lanbide Heziketearen webgunea barriztau dabe

Laneki Lanbide Heziketa sustatu eta hobetzeko alkarteak Jakinbai webgunearen diseinu barria eta edukiak aurkeztu ditu. Euskerazko materiala sortu eta Internet bidez zabaltzea da gunearen helburu nagusia.

Bilbok Latinoamerikako egileen lanean zehar egingo dan ibilbideagaz ospatuko dau Poesiaren Munduko Eguna

Alex Angulo eta Loli Astoreka antzezleak izango dira Latinoamerikako egileen lan poetikoari ahotsa jarriko deutsienak. Musika arloa, barriz, José Urrejola musikari eta konposatzailearen esku egongo da.

Martina Ibaibarriaga gerrillari berriztarraren historia berreskuratzeko

Martina Ibaibarriagak Napoleonen tropen kontra burrukan egin eban, koronel gradua lortu, eta Wellington bera be harrituta itxi eban. Halanda be, personaia historiko guztiz ezezaguna da gerrillari berriztarra. Ascensión Badiolak haren irudia berreskuratu nahian idatzi dau Martina, guerrillera (Txertoa) nobelea.

Polonia, Danimarka eta Txekiar Errepublikako bandak izango dira Getxoko Jazzaldiaren Talde Lehiaketako finalean

Getxoko Jazzaldiaren 37. edizinoko Talde Lehiaketako finalean parte hartuko daben taldeak dagoeneko hautatu ditue. Aurten, 56 taldek parte hartu dabe lehenengo fasean eta, horreen artean, honako lau honeek hautatu ditu epaimahaiak: Michal Szkil Quintet (Polonia), Artur Tuznik Trio (Danimarka), Jan Feco Quartet (Txekiar Errepublika) eta Freeway Quintet (Polonia).

Mikel Laboa Katedrea sortu dau EHUk

EHUK eta Gipuzkoako Foru Aldundiak Mikel Laboa Katedrea aurkeztu dabe Gipuzkoako Campuseko Carlos Santamaria Zentroko Antonio Beristain entzunaretoan. Mikel Laboaren eredua izango da katedrearen erdigunea, eta arteen artekotasunaren eta euskal folklorearen hainbat atal ikertuko dira.

Bernardo Atxagari eskainitako programa zabal bat antolatu dabe Madrilen martiaren 20tik apirilaren 7ra

Obabakoak eleberriaren 25. urteurrenean, Centro Dramático Nacional, Casa del Lector eta Matadero Madrid zentroan dagoan Cineteca kulturguneek Bernardo Atxagari eta bere lanari eskainitako kultur programa zabala antolatu dabe Madrilen martiaren 20tik apirilaren 7ra bitartean, Etxepare Euskal Institutuagaz alkarlanean.

'Bat-batean' musikea eta bertsoa osogai dituan ikuskizuna estreinauko dabe Gallartan

Bertsoa eta musikea buztartzen dituan Bat-batean izeneko ikuskizuna aurkeztu dau Oskar Estangak. Bertsotan grabautako musikeagaz, gitarrea lagun, beste bertsolari batzuekaz kantuan egingo dau. Lehenengo saioa barikuan daukie, hilak 22, Gallartan.

Fant 19K Aura Garrido antzezleari emongo deutso Fantrobia Saria

23 urte baino ez dituan arren, Aura Garridok ibilbide luzea daroa zineman eta telebistan. Telesail arrakastatsuetan hartu dau parte, Física y química, La pecera de Eva, Ángel o demonio, Crematorio edo Imperium, besteak beste. Zineman sei film luzetan hartu dau parte 2010etik, eta azkenekoa Oriol Pauloren El cuerpo, genero fantastikoaren barruan sartzen da, datozen hileotan estreinauko diran Stockholm (2012) eta Viral (2012) lanak bezela.

Nestor Basterretxeak Bermeon dituan artelanak ikusteko bisita gidatuak izango dira

Bermeoko Udaleko Turismo Bulegoak Nestor Basterretxea artisteak bere jaioterrian dituan artelanak ezagutzeko bisita gidatuak antolatu ditu, eta holan, Euskal kosmogonia, Hilargi Amandrearen Mamuak, Hilarriak, Olatua eta Benito Barruetaren omenezko monumentua ikusi ahal izango dira dobako bisita gidatuetan.

'Basarri' bertsolariaren omenezko egitarau zabala antolatu dabe Zarautzen

Iñaki Eizmendi Manterola Basarri-ren jaiotzearen mendeurrenean, kazetari eta ohorezko euskaltzaina izan zanaren omenezko egitarau zabala atondu dabe Zarautzen apiriletik zemendira bitartean. Zemendian egingo dabe ekitaldirik handiena, Basarriri buruzko erakusketea eta Basarritik Azken Portura jaialdia, hain zuzen be.

Udabarri freskoaren atarian, erle gizajoak be bufandeagaz...

Dantzan.com-en aldeko babesle kuota kanpainea abiatu dabe

Dantzan.com-ek atariaren aldeko babesle kuota kanpainea martxan ipini barri dau. Orain hilabete batzuk webgunea zarratu beharra izan eben, eta orduko arazoak kopondu arren, barriro be egoera larrian dago proiektua.

Zabalik honezkero Blas de Otero-Bilboko Hiria Sariaren VI. edizinorako lanak aurkezteko epea

Martiaren 15ean, Bilboko poeta handiari eskainitako egunean, Bilboko Udaleko Kultura eta Hezkuntza Sailak, Blas de Otero Fundazinoagaz alkarlanean, Los Goliardos taldearen kontzertua antolatu dau; emonaldia arratsaldeko 19:30etan hasiko da, Bidebarrietako Liburutegiko ekitaldi aretoan. Sarrerea librea izango da, leku guztiak bete arte.