Aktualitatea

Euskaltzaindiak ohorezko 12 euskaltzain barri izentau ditu

Donostian egindako osoko bilkuran aukeratu ditu Akademiak ohorezko euskaltzain barriak. Paulo Agirrebaltzategi, Angel Aintziburu, Dionisio Amundarain, Xabier Amuriza, Xipri Arbelbide, Antonio Campos, Maite Idirin, Mixel Itzaina, Jon Landaburu, Joan Martí, Martin Orbe eta Manu Ruiz Urrestarazu dira izendapena jaso dabenak.

Bilbon saritua izan zan 'High Tension' filmak irabazi dau Coloradoko Mountain Film Jaialdiko Charlie Fowler Saria

Pelikula sarituak Ueli Steck, Simone Moro eta Jonathan Griffith alpinista entzutetsuek Everesteko 2. kanpalekuan jasandako erasoaren barri emoten dau. Erabat sumindutako sherpa talde batek harrika eta kolpeka egin eutsen eraso hiru mendizaleei, eta jazoereak eztabaida eta zalaparta handia sortu eban mundu osoan eta batez be mendi giroan.

Aniztasunaren aldeko 11 Danbor Martxan 40 perkusino eta animazino taldek parte hartuko dabe Donostian

Euskal Herria 11 Kolore herri ekimenak zapaturako, maiatzaren 31rako, Donostian deitu dauen 11Danbor Martxarako dana prest dauka. Eskubide berak, betebehar berak, aukera berak lelopean egingo dan martxea 11Kolore Jaiaren ekitaldi nagusia da. Igaz egin zan lehenengo aldiz jai hori, kultur eta jatorri aniztasunaren balioa aldarrikatzeko.

Karuena ez da beti onena izaten...

'Narrazioak eta olerkiak 2013' liburua argitaratu dabe BBK-k eta Euskaltzaindiak

Bilbao Bizkaia Kutxa Fundazinoak eta Euskaltzaindiak antolatutako 2013ko Resurreccion Maria Azkue sarietan irabazle izandako narrazinoak eta olerkiak batu ditue Narrazioak eta olerkiak 2013 liburuan. Maddi Aiestaran, Olatz Bereziartua, Anne Agirre, Lorea Azpiazu, Naia Ordorika, Aiora Amenabar, Lourdes Ondaro, Markel Txasko, Ane Saiz, Maialen Akizu eta Inhar Esnaola izan ziran 2013ko saridunak.

'Dragoi Bola Z' filma euskeraz helduko da astegoienean

Dragoi Bola Z euskeraz ikusteko aukerea izango da Zineuskadi Alkarteak kudeatzen dauen Zinema Euskaraz programeari esker. Estreinaldia gainera, Platform estilo amerikarreko aste amaiera bateko ekitaldia izango da maiatzaren 30, 31 eta bagilaren 1ean.

Martxan da 12. Caostica Film Laburren jaialdia

Zapatura bitartean, Caostica film labur eta bideoklipen jaialdiak 39 lan erakutsiko ditu Bilbon. Lan sarituak astelehenan, bagilak 2, ikusi ahal izango dira EHUren Bizkaia Aretoko Paraninfoan, 20:00etan. Emonaldi guztiak debalde dira.

Urtebeteko etenaren ondoren, IX. Mundumira bueltan da

2013 gogoetarako hartu eta gero, 2005ean bidea hasi zan lekuan bertan, Arrasaten ekingo deutso barriro be martxeari Mundumirak, munduko kulturen jaialdiak, maiatzaren 30etik bagilaren 1era.

'Gorantz goaz, GO, GO!' lemapean, Euskal Eskola Publikoaren jaia Balmasedan, bagilaren 1ean

Enkarterrira doa aurten Euskal Eskola Publikoaren jaia, Balmasedara. Mendia ikastetxe publikoko ikasle, irakasle eta gurasoek egun oso egitarau ederra atondu dabe, kontzertuak, tailerrak, pailazoak, putxera dastaketea eta abar.

Zinebik 'GMO: Genetikoki Eraldatutako Organismoa' eskainiko dau eguenean Bilbon

Zinebi Bilboko Zine Dokumentalaren eta Film Laburren Nazinoarteko Jaialdiak GMO: Genetikoki Eraldatutako Organismoa dokumental estadubatuarra eskainiko dau eguen honetan, maiatzaren 29an, urte osoan programazinoari jarraipena emoteko antolatzen dauen Hileko Dokumentala estreinaldi zikloaren barruan.

Lansarean, enpresa eta profesional euskaldunek alkar ezagutzeko tresnea erabilgarri

Bai Euskarari Ziurtagiriaren Alkarteak arlo soziekonomikoaren euskalduntzean eragitea dau helburu eta Enpresareanen bitartez pausu esanguratsuak egin ditu. Lansarean.org helburu horretan bidea egiteko tresna barria da. Lansarean.org helbidean, enpresek beren lan-eskaintzak jarri ahal izango ditue; lan bila dabilzan profesionalek, curriculumak igon eta lan-eskaintzetan izena emon ahal izango dabe.

'Bertsolaritzea irakaskuntzan' programeari eutsi eta finantzau daiala eskatu deutse Nafarroako Gobernuari

Nafarroako Parlamentuko Hezkuntza Batzordeak bart onartu dauen mozinoak Nafarroako Gobernuari eskatzen deutso Bertsolaritzea irakaskuntzan programeari eutsi eta finantzau daiala, horren egonkortasuna ziurtatu ahal izateko. Mozinoak PSN, Bildu, Aralar-Nabai, Izquierda-Ezkerra eta PPren babesa jaso dau. UPNk baino ez dau kontrako botoa emon.

'Enkarterriko ipuinak' liburua argitaratu dau Bizkaiko Foru Aldundiak

Seve Calleja idazleak koordinetan dauen Bizkaiko Kondairak bildumako lan barria da Enkarterriko ipuinak/Cuentos encartados (Bizkaiko Foru Aldundia). Antonio Truebaren kontakizunak batu ditue, eta euskerazko itzulpena Imanol Etxebarriak egin dau.

Jon Arretxe idazle basauriarrak 'Hutsaren itzalak' nobelea kaleratu dau

Toure ikertzailea protagonista dauen hirugarren nobelea da Hutsaren itzalak (Erein), eta aurreko biak baino gordinagoa eta gogoragoa da. Oraingoan, emakumeek garrantzi handiagoa daukie istorioan. Ikertzaile-igarleari buruzko liburu gehiago idazteko asmoa dauka Jon Arretxek.

Berreginen Museoak, Manuel Balsa Errusiarra Aire Zabaleko VI. Akuarela Lehiaketea egingo dau zapatu honetan

Manuel Balsa Errusiarra Aire Zabaleko Akuarela Lehiaketea, lau hamarkada baino gehiagotan Museoko marrazketa eta pintura irakasle izan zanari eskainitako omenaldia da. Manuel Balsa 2010eko urtarrilean hil zan. Irakasle lanetan egin zituan ia 50 urteetan, Manuel Balsa Errusiarrak milaka bizkaitarri erakutsi eutsen margotzen eta marrazten.