Laukizek José Antonio Goirigolzarri, Litri azken 50 urteotan egindakoakaitik autortu dau

José Antonio Goirigolzarri, Litri. | Ikusi handiago | Argazki originala

Laukiz barriro bere sokatirearen erreferente bihurtu da astegoienean, 560 kg, 500 kg eta Junior kategorietako Euskadiko Sokatira Txapelketako finalak hartuta. Hitzorduak zale ugari batu zituan, eta maila goreneko jardunaldiaz gozetako aukerea izan eben, euskal sokatirako tiralari onenetako batzuk eta selekzinoen arteko munduko txapelduna dan Euskadiko selekzinoko kideak protagonista izan ziralarik. Lorpen historiko horri esker, taldeak hainbat aldiz igon dau nazioarteko podiumeko mailarik gorenera, urrezko dominak eskuratu ondoren Euskadiko ereserkia entzunarazoz.

Lehiaketeak giro bikaina eta maila handiko lehia eskaini zituan hiru kategorietan. Junior kategorian, Gaztedi A izan zan txapelduna, Gaztedi B bigarren sailkatu zan eta Goiherri hirugarren. 560 kiloko kategorian, Gaztedi A nagusitu zan, Goiherri A eta Akelarre taldeen aurretik. 500 kiloko kategorian, barriz, Goiherri A izan zan irabazlea, Gaztedi A bigarren eta Akelarre hirugarren.

Txapelketeak barriro be erakutsi dau sokatirea bizirik dagoala eta, zehatz, Gaztedi klubak egiten dauen lan aparta, izan be, klubak jokatutako kategoria guztietan podiumera igotea lortu dau, eta horreetako bitan Euskadiko txapeldun izentau eben.

José Antonio Goirigolzarri

Sokatirako finalak amaitu ondoren, José Antonio Goirigolzarri omendu eben, sokatireari lotuta daroazan 50 urteak autortuz. Ekitaldian herri kirol honetan tiralari lez eskainitako bizitza osoa nabarmendu eben, haren konpromisoa, ahalegina eta diziplina honen balioak belaunaldi barriei transmitiduten egindako ekarpena azpimarratuz. Bertaratutako publikoak txalo zaparrada bero bategaz eskertu eban autortzea.

Omenaldiaren ondoren, Gaztediren Herri Bazkaria izan zan Probalekuan. Bertan, kirolariek, klubek, zaleek eta herritarrek alkarregaz gozau eben, herri kirolez eta jai giroaz betetako goizari amaiera bikaina emonez.

Laukizko Udalak zoriondu egin ditu txapelketan parte hartu daben talde guztiek erakutsitako maila handiagaitik eta, era berean, Gaztedi klubaren, boluntarioen eta txapelketea atontzea posible egin daben persona guztien lana eskertu dau. Era berean, sokatirea herri kirolen diziplina berezienetakoa izaten jarraitu daian eta Euskadiko kirol eta kultura ondarearen parte dan kirol honi bizirik eusteko lanetan jarraitzearen garrantzia nabarmendu dau.