Kukutza gaztetxea hustu ebeneko kronikak eta gogoetak liburu baten batu ditue

| Ikusi handiago | Argazki originala

Alkarlanean egindako liburua da, Lutxo Egia idazlearen ideiatik abiatuta eta Kukutza hurretik ezagutu eben askok parte hartu dabe. Kukutza gaztetxea, ellos por dinero, nosotras por placer lana, batez be, burruka liburua dala aitatu dau Jon Jimenez Txalaparta argitaletxeko kideak, irailean Kukutzaren hutsitze prozesuan bizitakoa ez eze, Errekalden gaztetxeak egindako lana eta okupazino mobimentuaren ereduak Bilbo moduko uri bati ekarten deutsan onurea batu ditue-eta.

Kalidade handiko liburua da, kronika eta gogoeta mamitsuz hornidua eta irudi ikusgarriz jantzia. Halandabe, Lutxo Egiak autortu dau presaka sortutako proiektua izan dala, desalojoa gertatu eta biharamunean sortu zan ideia; gaztetxekoei proposatu eta berehala lanean hasi ginan, hiru astean dana idatzita egoan eta maketazino zein inprentatik pasau eta gero, Durangoko Azokara justu-justu ailegau ginan.

Kukutza Gaztetxeko kideek, hasiera baten, zalantzak euki zituen liburuari buruz. Kukutzak 13 urteko ibilbidea egin eban eta liburua plazaratzeko ideia aspaldi sortu zan, baina eraikina bota eta biharamunean Lutxo etorri zanean, zalantzan egon ginan, une egokia ete zan, azaldu dabe. Dana dala, aurrera egitea erabagi eben eta euren ikuspuntuak balio handiagoa emon deutso Lutxo Egiak idatzitako testuari. Ganera, gizarte gaietan adituak diran persona batzuen gogoetea be sartu dabe, Iñaki Uriarte arkitektoa, Juantxo Estebaranz historiagilea, Pedro Ibarra eta Ramon Zallo irakasleak eta abar. Saski-naski ordenatua da, bizipen, jazoera eta gogoeten moltsoa, baina hari bati jarraitzen deutsana, Egiaren esanetan.

Liburua 50 kapitulutan banatuta dago, baina hiru sail nagusi daukaz, irailaren 21, 22 eta 23ko egunei lotuak, hurranez hurran. Lehenengo sailak Kukutza izena dauka eta desalojoaren eguna (21a) dau ardatz; bigarrena, Kukutxa izenekoa da, irailaren 22an epaitegietan gertatutakoaren inguruan. Berba jokoa egin dot, Kukutza eta Kutxa izenakaz, espekulazinoagaz eta interes ekonomikoagaz lotu nahi izan dot egun haretakoa, dino Egiak. Azkenik, hirugarren zatia Kukutza da, gaztetxea bota eben egunari jagokona, hutsaren sentsazinoa dakar berba joko horrek, baina hutsa bete egingo dala be gogoratu nahi izan dot.

Kukutza gaztetxeak zein antzeko okupazino proiektuek Bilbo moduko uri bati emoten deutsien bizia defendidu dabe Lutxo Egiak, gaztetxeko kideek eta liburuan parte hartu daben ganerakoek: Kukutza eredua da, gaur egungo krisiaren erruz, nondik jo behar dogun erakusten dau; auzoa eta eredu alternatiboa buztartzen jakin eban Errekalden, aitatu dabe. Holan, irailaren egun hareek ezin dirala ahaztu azpimarratu dabe, Errekalde eta Bilborentzat garrantzitsuak izan ziralako, okupazino mobimentua sendo dago, Kukutzaren ostean beste batzuk etorriko diralakoan nago, nabarmendu dau Juantxo Estebaranzek.

Denpora tarte laburrean egindako liburua da, baina hile batzuk beranduago argitaratu izan bagendu, beste era batekoa izango zan, gogora ekarri dau Lutxo Egiak. Kukutzako kideek ganeratu dabenez, hau momentu aproposa da holako liburu bat atarateko, hileotan desalojo ugari gertatzen dabilz Euskal Herrian eta okupazinoaren eta autogestinoaren ereduari buruzko gogoetea beharrezkoa da. Oraingoz, liburua espainolez baino ez dago eskuragarri, baina Lutxo Egiak ziurtatu dau euskerazko bersinoa preparetan dabilzala eta urtarril amaierarako argitaratu gura dabela.