Gradu gitxiagoko ardao barri bat: Altos de la Ermita

Casa de la Ermita taldeak teknika barri baten bidez 'alkohol gitxiagoko ardaoa' atara barri dau, % 6´5 - 7 gradukoa, ardao normal baten graduazinoaren erdia dauena. Ardao baltz barri horrek, Altos de la Ermita deiturikoak, merkadua gradu gitxiagoko ardaoak eskatzen dagoan momentuan sortutakoa bada be, legeak ezarritakoa bete beharko dau.

Izan be, Europako legediaren arabera, mahatsaren fermentazinotik eratorri eta gitxienez 9 gradu alkohol dauen produktuari esaten jako ardao.

Altos de la Ermita ikerketa proiektu baten emoitzea da, Cartagena eta Murtziako Unibersidadeek, CDTIgaz (Ikerketa eta Garapen Teknologikorako Zentroa) batera egindakoa. Ikerketearen kostua bi miloe eta erdi eurokoa izan da eta Ibersuizas, Caja Murcia eta Corporación Mafrek hartu dabe bere gan.

Ardaoa 2006ko kriantza bat da eta monastrell, tempranillo eta petit verdot mahatsakaz eginda dago.

Aukera egokia da produktu barri honentzat, izan be, gradu gitxiko edariak asko eskatzen ditue kontsumitzaileek, bai ardaoen ohiko gradua altuegia izan daitekelako edo baita gidariei alkoholaren inguruan jarritako neurri zorrotzek eraginda.

Nazinoarteko merkaduan, honezkero, badagoz alkoholik bako ardaoak (ezagunenak frantziar Bonne Nouvelle, Languedoc Rousilloneko kooperatiba talde batean egindakoa eta Iparramerikako Sutter Home eta Ariel Vineyards). Low alkohol wines deiturikoak arrakastatsuak dira kaloria gitxiko produktuen bila dabilzanen artean.

Alkoholik bako ardaoaren berezitasun bat da, besteak beste, siketeari etekinak atara guran sortu dala. Hau da, estres hidrikoa deituriko metodoa erabili da, hau da, mahatsa helduten edo umatzen hasten danean urik ez botatea ardatz dauena, azukerarik ez produziduteko. Elaborazinoan tenperatura aldaketa handiak sortarazoten dira, 15 gradurainokoak hiru orduko tartean. Holan, legamien eraginak behera egiten dau eta, era berean, azukera asko ez dira alkohol bihurtzen. Ganera, legamia bereziak erabilten dira, eragin gitxiagokoak, azukera gitxiago sortzeko.

Ondoren, barriketatik pasau ostean, gehiago bajatuten da gradua (3tik 6ra bitartean); botilaratu aurretik, hotzetan egiten dan lurruntze-sistema baten bidez, kono rotatorioak erabiliz alkohola indar zentrifugoen bidez bereizi edo banandu egiten da. Kono horreek spinning-cones deitzen dira eta Australian eta Californian erabilten dira jatorriz 16 gradurainoko ardaoen graduak murrizteko.

Amaitzeko, prezioa aitatu behar da. Gitxi gorabehera, 700.000 botila eginda, bodegan 6 euro ingurukoa izango da botilearen prezioa eta denda espezializauetan 11-12 eurokoa. Duda barik, enologiaren ikuspegitik oso produktu interesgarria da datorren hilean merkaturatuko daben ardao hau.