Los crimenes de Oxford

| Ikusi handiago | Argazki originala

- Zuzendaria: Álex de la Iglesia.
- Herrialdeak: Espainia, Erresuma Batua eta Frantzia.
- Iraupena: 110 minutu.
- Antzezleak: Elijah Wood (Martin), John Hurt (Arthur Seldom), Leonor Watling (Lorna), Julie Cox (Beth), Anna Massey (Sra. Eagleton), Alex Cox (Kalman), Dominique Pinon (Frank), Jim Carter (Petersen inspektorea).
- Gidoia: Álex de la Iglesia eta Jorge Gerrikaetxebarria; Guillermo Martínez-en nobelan oinarrituta.
- Musikea: Roque Baños.
- Argazkia: Kiko de la Rica.
- Muntaia: Alejandro Lázaro.
- Diseinua: Cristina Casali.
- Jantziak: Francisco Delgado.

Alkar lehenengoz ikusi daben lagun bik, Arthur Seldom Logika irakasle ospetsuak eta Martin unibersidadera heldu barri dan ikasle estadubatuarrak, edadeko andrazko baten gorpua topau dabe beraren etxeko egongelan. Emakumezkoaren heriotzea hilketa arduragarri batzuen hasikerea besterik ez da.

Álex de la Iglesiaren film honek hasikera sendoa dauka eta personaia nagusien aurkezpena ona da. Hala eta guztiz be, kontakizunak aurrera egin ahala, interesa galdu eta beheraldi horretatik urten gura dauenerako beluegi da.

Narrazinoa gidatzeko Matematikak erabili izanak ikusleak nahastau eta bape erakargarritasunik ez daben teorietan galtzea eragiten dau, baina hori ez da pelikulearen arazo nagusia. Ez, hutsik agirikoena erritmo gorabeheratsuan dago; unekada batzuetan ez dala ezer be pasetan emoten dau. Zuzendari bilbotarrak egile trebea dala erakusten deusku eta zinegile handien estiloa (Alfred Hitchcock eta Steven Spielberg) imitetan dau eraz, baina ez berak ez Jorge Gerrikaetxebarriak ez dabe asmau filmak irauten dauen ordu bietan ikusleak tentsinoan eukiteko gidoia idazten.

Filmaren alderdi teknikoak ondo jagon dira eta Elijah Wood nahiz John Hurt aktoreen antzezpenak sinisgarriak dira; Leonor Watling, ostera, bere gorputz lerdena erakustera mugatzen da nahiko behartuta sartutako eszena batzuetan. Laburbilduz, film interesgarria, baina ez apartekoa.