Dialogue avec mon jardinier

| Ikusi handiago | Argazki originala

-Zuzendaria:Jean Becker.
-Herrialdea:Frantzia.
-Iraupena:109 minutu.
-Antzezleak:Daniel Auteuil (margolaria), Jean-Pierre Darroussin (lorezaina), Fanny Cottençon (Hélène), Alexia Barlier (Magda), Hiam Abbass (lorezainaren emaztea), Élodie Navarre (Carole).
-Gidoia:Jean Cosmos, Jacques Monnet eta Jean Becker; Henri Cueco-ren nobelan oinarrituta.
-Argazkia:Jean-Marie Dreujou.
-Muntaia:Jacques Witta.
-Diseinua:Thérèse Ripaud.
-Jantziak:Annie Périer Bertaux.

Garrantzi handiko gauzak eguneroko bizimoduan dagoz; horixe da lorezain xume batek margolari ezagun eta fribolo bati irakatsiko deutsona. Gauza garrantzitsuak familiarteko porrotaren lainoetan ostendutako azaleko apaingarrien atzean agertuko jakoz margolari egolatreari, tarteka-marteka ikusten diran itsas argi distiratsuak balira lez.

Film honetako zuzendariak adiskidetasunaren inguruan bilbatutako istorio intemista eta eder bat atondu dau; horretarako, bizimoduaren xumea aldarrikatu eta bizitzea sinpletasunaren begirada atsegin batez aztertu gura izan dau. Gauza txikiak eta alkarrizketa gozoak azalduko jakuz bizitzeari, heriotzeari eta eguneroko arazoei urtenbidea topetako tresna modura.

Gidoiak, beraz, ikaragarrizko garrantzia dauka pelikula honetan, eta, egia esan, alkarrizketak benetakoak dirala emoten dau, burutsuak, ironia sutil eta zorrotz batez zipriztinduak eta zuzenak baizen zintzoak. Berben boterea irudien indarrari nagusitzen jako, ederto errodatu eta ondo be ondo planifikautako film honetan; hori bai, kontakizunaren nondik norakoak lar erraz aurreikusten dira eta personaia bakar baten bilakaerea baino ez dogu ikusiko.

Kontuak kontu, estu eta larri dabilzan lagun bi honeen ganeko istorioa kutuna eta maitagarria da eta atsegin handiz ikusten da. Ezelako prisa barik alkarrizketa jakingarri eta benetakoak entzuteko aukera ederra izango dozue; hori bai, personaien zinema eta istorio intimistak nahiz lasaiak gustetan ez bajatzuez, ez joan Dialogue avec mon jardinier ikusten.