'Alperrak sobra eta langileak falta'

| Ikusi handiago | Argazki originala

Aste birik bateko kontuakaz nator oraingoan be. Miren Amuriza bertsolari gaztearen hiru bertso daukazuez aurrez aurre. Maiatzaren bata, Langileen Eguna izanik, aukera ona ikusi genduan Miren Amurizari horren ganeko bertso-idatzi batzuk eskatzeko.

Bera Bizkaiko Bertsolari Gazteen hainbat txapelketatan ibili da eta guztietan emoitza onak be onak lortu ditu. Ez gara gitxi etorkizun ez urrunean Bizkaiko Txapelketa Nagusiaren punta-puntan ikusten dogunok. Gozau eizue!

Alperrak sobra eta

langileak falta,

Izerdiak orain be

bere gatza dauka.

Eredutzat harturik

maiatzaren bata,

ez al da indartzeko

aukera aparta?

Geuk egiten doguna

geuretzako da ta.

Munduan bada hainbat

langile ondradu,

egunero hiltzen dira

sei mila inguru.

Gizarteak aurrera

egin behar badu,

nahiz garbitzaile izan

edo abogadu,

lan baldintza justuak

merezi ditugu.

Lantegian sartuta

egun eta gaba,

ordu estrak egiten

nazkatuta jada,

lau pezetaren truke

konformatzen gara.

Langileen geroa

bermatuko bada,

burua jaso eta

zatoz borrokara!

Miren Amuriza