Zigor Enbeita nagusi Zigoitian

| Ikusi handiago | Argazki originala

Zigor Enbeitak irabazi eban pasa dan domekan Zigoitian izandako Arabako Bertsolari Txapelketako lehen finalerdian. Saio erregularra eta ia akatsik bakoa osotu eban bertsolari izarrarrak eta bost punturen aldea atara eutsen Iñaki Viñaspre eta Manex Agirreri.

Ehun entzule inguruk bete eben Zigoitiako Aretoa, eta bertsolariek hasiera ona emon eutsen saioari. Zortziko nagusian danak ibili ziran maila onean eta alkarrizketa txukunak entzun ahal izan zituen bertaratutakoek. Manex Agirre itsua zan eta ospitalera bidean jarri eban Irati Lotina gai-emoileak. Ruben Sanchezi bisita egitera joan zan, ebakuntza bati esker ikusmena berreskuratu eban lagunari hain zuzen. Manexen bigarrenari erantzunez holan bota eutson Sanchezek, ‘ze ikusten dudan esango dizut neri eskatu bezela/ lehengo gauza esango dizut nahiko guapoa zarela’, eta Agirreren azkena berriz honakoa izan zan ‘orain ez naiz hain itsu sentitzen lagun on bat dudalako’.

Zortziko txikian bere izan ziren ale ederrak, eta bertsolariek umorea erabili eben entzuleak txaloka jarteko. Felipe Zelaieta eta Izar Mendiguren bikote ohiak, agentzia bidez bikote barria bilatu gura eben eta zitara agertuta alkarregaz egin eben topo. ‘Utzi ninduzun triste, ilun, mehar/ banekien ez ginela gu banandu behar’ kantau eutson Zelaietak eta Izarrek ostera, ‘askori pasa zaio ta dut konprenitzen/ badakit zaila dela ni gabe bizitzen’. Sanchez eta Enbeita be tabernan alkartu ziran. Sanchezek 30 euro bota zituan txanpon-makinan eta dirua aldatzera joateko unean, Enbeitak saria jaso eban. Gogor hasi zan Ruben Sanchez ‘emaidazu erdia txerri alaenak/ edo jango dituzu horko fruta denak’ esan eutson eta Enbeitak zuzen erantzun ‘gizartean itxura ez al da hau oso/ zuk makina berotu nik dirua jaso’.

Hamarreko txikiko ariketan moteldu egin ziran bertsolariak eta orduan egin eban behera bertso saioak. Puntu erantzunak heldu ziren ondoren, eta danak nahikoa erregular ibili ziran. Nabarmentzekoa izan zan Izar Mendigurenen lehen puntu erantzuna, saioko bertsorik onenetakoa izan zan <Gaztea izatea ez da hain erreza/ zenbat arazo eta zelako estresa/ gainera zail da aurkitzen legeen babesa/ baina zailagoa da gaztetasun eza’.

Kartzelako gaiari bina bertso bota behar izan eutsozan bertsolari bakotxak saioari amaierea emoteko. Gai edegia emon eutsen Lotinak, <Azken aldian buruan bueltaka darabilzu hau: egingo dut edo ez dut egingo?’ eta bakotxak bere bidea asmatu behar izan eban. Agirre eta Viñaspre izan ziran egokien ibili ziranak. Agirrek, bere buruaz beste egitea erabagi eban azken bertsorako eta Viñasprek barriz, etxea erosi nahi eta hipotekak sortzen eutsozan estuasunak arintzeko bidea asmau eban.

Bertsolari guztiek, datorren domekan (martiak 25), Aramaion jokatuko dan saioaren zain egon beharko dabe finalean nortzuk sartuko diran jakiteko. Sei finalistek puntuazinoaren arabera lortuko dabe-eta finalerako txartela. Oihane Perea, Asier Otamendi, Andere Arriolabengoa, Juan Mari Juaristi, Rikardo Gonzalez de Durana eta Serapio Lopezek kantauko dabe Aramaioko Kultur Etxean.

Puntuazinoa:

Zigor Enbeita 328,5
Iñaki Viñaspre 323,5
Manex Agirre 323,5
Ruben Sanchez 315,5
Izar Mendiguren 309
Felipe Zelaieta 294