Joanes Illarregik irabazi dau Tafallako saioa, eta osotu da finala

Bizkaie! 2025-11-17 07:50   Bertsolaritzea

Tafallako Kulturgunean jokatu da 2025eko Nafarroako Bertsolari Txapelketako hirugarren eta azken finalaurrekoa, ia 300 lagunen aurrean. Nafarroako Bertsozale Alkarteak atondu dua saioa, Tafallako Udalaren laguntzeari esker. Han, zozketeak erabagitako ordenean, ondorengo bertsolariak ibili dira kantuan: Amaia Elzagoien Varela, Xabi Maia Etxeberria, Ekain Alegre Gil, Josu Sanjurjo Alzuri, Joanes Illarregi Marzol eta Xabat Illarregi Marzol. Zigor Gartzia Zianek aurkeztu dau saioa, eta epaile lanetan, barriz, Cesar Etxeberria, Joseba Beltza, Mikel Beaumont, Nerea Bruño eta Patxi Barberena ibili dira.

• Tafallako saioko sailkapena:
• Joanes Illarregi Marzol (528,0).
• Xabat Illarregi Marzol (516,5).
• Josu Sanjurjo Alzuri (486,0).
• Xabi Maia Etxeberria (466,0).
• Amaia Elizagoien Varela (427).
• Ekain Alegre Gil (425,0).

Horrenbestez, argitu da zortzi finalisten zerrendea. Agoizko, Leitzako eta Tafallako finalaurrekoetako hiru irabazleei (Eneko Lazkoz, Julio Soto eta Joanes Illarregi) puntuazinoaren araberako beste bost bertsolari gehitu jakez. Daborduko azken hitzordu hori baino ez da falta Nafarroako Bertsolari Txapelketea amaierara heltzeko. Zemendiaren 29an izango da, lehen aldiz, Nafarroa Arenan.

Erabagi da finaleko zortzikotea

Finalaurreko guztiak jokatuta, erabagi da Nafarroa Arenako finalean zein bertsolarik kantauko daben: Eneko Lazkoz, Julio Soto eta Xabat Illarregiz gan, beste bost bertsolarik osotuko dabe zortzikotea.

Txapelketeak zeharkatu ditu Nafarroako lur berde, hori eta gorriak; eta azken geltokia baino ez jako falta: finala. Orain artekoak jokatuta, argitu da zortzi finalisten zerrendea. Finala zemendiaren 29an izango da, Iruñeko Nafarroa Arenan, arratsaldeko 17:00etan hasita.

Agoizko, Leitzako eta Tafallako finalaurrekoak jokatuta, erabagi da finaleko zortzikotea: ondokoek kantauko dabe finalean:

1. Joanes Illarregi Marzol.
2. Julio Soto Ezkurdia.
3. Xabat Illarregi Marzol.
4. Eneko Lazkoz Martinez.
5. Saioa Alkaiza Guallar.
6. Ekhiñe Zapiain Arlegi.
7. Sarai Robles Vitas.
8. Eki Mateorena Zozaia.

Lehen aldia da Nafarroako Bertsolari Txapelketako finala Nafarroa Arenan jokatuko dana. Ainhoa Larretxea Agirrek eta Ander Aranburu Arriolak jarritako gaiei kantau beharko deutsee bertsolariek ondorengo ariketetan:

Binaka, gaia emoda, hiruna bertso zortziko handian.
Binaka, gaia emoda, hiruna bertso zortziko txikian.
Banaka, lehen puntua emomda, hiru bertso zortziko txikian.
Binaka, gaia emonda, hiruna bertso hamarreko txikian.
Banaka, gaia emonda, hiru bertso nahi dan doinu eta neurrian.
Buruz-burukoa (9 bertso puntuagarri).

Binaka, gaia emonda, zortziko txikian puntutan, zortzi bertso osotu arte.
Binaka, gaia emonda, hiruna bertso sei puntuko motzean.
Ganbarako lana.

Banaka, gaia emonda, hiru bertso nahi dan doinu eta neurrian.
Ariketa horreek guztiak egin ostean, epaileen puntuazinoak jasota, jakingo da nor dan 2025ko Nafarroako txapelduna. Hitzordua ez galtzeko, sarrerak salgai dagoz hemen. Horri begira, bariku honetan, hilaren 21ean egingo dabe finalaren aurkezpena, eguerdiko 12:00etan.