Little Miss Sunshine
2006-11-14 01:00 Zinema kritikakHoover familia bitxiak bidaia egingo dau neskatoentzako edertasun lehiaketa batean parte hartzeko. Horrek, itzelezko kaosa sortzeaz aparte, goitik beherako aldaketak be ekarriko dauz protagonisten bizitzetara. Antzezleen lana azpimarratzekoa da; nork baino nork jardun eta kontakizunari gidoiak ez daukan sinisgarritasuna emon deutsie.
-Zuzendaria: Jonathan Dayton eta Valerie Faris.
-Herrialdea: AEB.
-Iraupena: 101 minutu.
-Antzezleak: Greg Kinnear (Richard), Toni Collette (Sheryl), Steve Carell (Frank), Paul Dano (Dwayne), Abigail Breslin (Olive), Alan Arkin (aitita).
-Gidoia: Michael Arndt.
-Musikea: Mychael Danna.
-Argazkia: Tim Suhrstedt.
-Muntaia: Pamela Martin.
-Diseinua: Kalina Ivanov.
-Jantziak: Nancy Steiner.
Hoover familia bitxiak bidaia egingo dau neskatoentzako edertasun lehiaketa batean parte hartzeko. Horrek, itzelezko kaosa sortzeaz aparte, goitik beherako aldaketak be ekarriko dauz protagonisten bizitzetara. Guztiaren ganetik irabaztea bultzatzen dauen gizarte batean galtzailea izatearen abantailak ikasiko dabez horrela.
Film honek eremu eta denpora tarte murritz batean guztiz heterogeneoak diran personai talde bat batzeko ohiko ereduari jarraitzen deutso, horrek absurdoa eta, haregaz batera, komikotasun eta barregarritasuna sortuko dauzalakoan. Little Miss Sunshine pelikulan, bada, egoera ezinezkoak agertuko dira, gizatasun eta maitasun handiz horniduta. Istorio samurra eta apatza da, neurriz kanpoko eztitasunik ez daukana, baina, seguru antzean, lar behartua. Zoritxarrez, familiaren eta nortasunen puzzlea exotikoegia da, benetakoa izan daiten.
Edozelan be, antzezleen lana azpimarratzekoa da; nork baino nork jardun eta kontakizunari gidoiak ez daukan sinisgarritasuna emon deutsie. Ondo be ondo jakin dabe, proportzino egokiari eutsita, zinismoa, gozotasuna, etsipena eta berotasuna erakusten; eurek ez beste ezerk biribildu dabe aparteko heldulekurik ez daukan filma. Ez da bikaina, baina aktoreen lana ikustea merezidu dau eta, ganera, unekada batzuetan barre egingo dozue.
Erantzun
Erantzuteko, izena emanda egon behar duzu. Sartu komunitatera!