'Euskaraz bidea eginez' kanpaineak Euskaltegietan matrikuletako animetan ditu herritarrak

Bizkaie! 2026-09-18 07:40 Euskerea berbagai

Euskeraz ez dakitenei eta ikasten jarraitu edo hobetu nahi dabenei zuzendutako kanpainea da.

Euskerea espazio eta egoera guztietan erabilteko dei egiten deuskue. Udalak euskaltegien, mailen eta ordutegien eskaintza zabalaren barri emon eta urtero banatzen dituan laguntza ekonomiko garrantzitsuak zabaldu ditu.

Bilboko Udalak euskeran zentrauta ekingo deutso ikasturteari. Eider Inuntziaga Euskerako, Herritarren Arreta eta Partaidetzako, 2030 Agendako eta Nazinoarteko Gaietako zinegotziak eta uriko 17 euskaltegietako ordezkariek Euskaraz bidea eginez aurkeztu dabe. Kanpaina hori Bilboko Udalak atondu dau bertoko euskaltegietan matrikulazinoa bultzatzeko 2026-2027 ikasturtean.

Gure hizkuntzea ez dakitenei eta ikasten jarraitu edo hobetu nahi dabenei zuzendutako kanpaina honen aurtengo goiburua, hain zuzen be, euskerea espazio eta egoera guztietan erabilten jarraitzeko animetan gaitu. Bilboko Udalak gero eta euskaldunagoa dan urian aurrera egiteko helburuaren harian, kanpainea dagoeneko ikusgai dago uri osoan zehar jarritako euskarrietan. Auzo guztietako bilbotarrek momentu eta formatu askotan izango dabe kanpainearen barri irailean zehar Bilbo osoan, han eta hemen: Bilbobusen autobus eta markesinetan, Bilboko Udalaren sare sozialetan, hedabideetan, barrutietako udaltegietan, kiroldegietan eta ikastetxeetan.

Kanpaineak zentro, ordutegi eta mailen eskaintza zabala nabarmentzen dau, baita Udalak urtero emoten dituan ikaskuntzarako laguntza ekonomiko garrantzitsuak be. 2026an, Udalak herritar guztiei zuzendu deutsee dirulaguntza horreek, Bilboko biztanleria guztia euskalduntzeko urratsa egiteko. Baldintza honeek beteten dituenek eskatu ahalko dabe: erroldauta egotea, gitxienez beheko maila bat gainditzea, bertaratzea % 60koa izatea, eta erakunde publikoakaz zorrik ez izatea. Diru-boltsea agortu arte emongo da dirulaguntzea. Igaz 2.095koa izan zan emondako dirulaguntzen kopurua.

Bilbok 17 euskaltegiko sarea dauka. Ohiko eskola eta ikastaroez gan, kolektibo eta enpresentzako barnetegiak eta berariazko ikastaroak eskaintzen ditu.

Ikusi argazki guztiak handiago