Irailaren 19an hasi eta udagoiena hartuko dau 2026ko Euskal Herriko Bertsolari Txapelketeak

Bizkaie! 2026-09-09 12:26   Bertsolaritzea

Bertsozale Alkarteak jarraipen estua egingo deutso Txapelketari, edukia hainbat formatu eta kanaletatik landuko dau, ahalik eta bertsozale gehienakana heltzeko. Bertso saioetan izango da komunikazinoko lantaldea, saio guztiak grabauko dira, ostera, etxetik barriro be ikus-entzuteko. Saioaren eretxiak batuko dira eta ostean parte-hartzaileei alkarrizketak be egingo jakez. Horrezaz gan, bertsogintzearen ertza aletuko dira astero, adituen analisiakaz eta Txapelketaz baino, bertsogintzaz eta kulturgintzaz ibiliko diran bideopodcasta argitaratuko da.

Bertsoaldiak

Saioen ostean, bertsoaldiak bertsoa.eus-en txartatuko ditue. Zapatuko saiokoak astelehenean; eta, domekakoak, matitzenean. Horrezaz gan, lehen faseko saioak osorik ikusteko aukerea be izango da ostean, ETB ONen. Behin lehen fasea pasauta, saio guztiak zuzenean emitiduko dira. Finalaurrekoak ETB1 On katean eta finala ETB1en.

Alkarrizketak

Saioko irabazlea eta parte-hartzaileak alkarrizketatzea da asmoa. Alkarrizketa horreek bertsoa.eus-en argitaratuko dira saioko bertsoaldiakaz batera.

Hitzetik Hortzera

Irailaren 13an hasiko da Hitzetik Hortzeraren denporaldi barria, domekan. Hortik hasi eta urtea amaitu bitartean txapelketearen barruko saioak emitiduko dira astero-astero. Emisinoak egunez aldatuko dira Txapelketan zehar (2026an). Domekan izango dira, 15:00etan.

Saio bakotxean Txapelketearen inguruko arlo bati begiratuko jako. Hasteko, txapelketearen kilometro kopuruari eta egiten dauen ibilbideari begiratuko jako; zozketen ingurukoak be landu dira, segurtasuna, Txapelketearen atonketea eta egiturea, sintonia, irudia eta eszenografia, epailetzea, borondatezkoen lana... Danetara, 16 saio izango dira. 2027an ohiko dinamikan jarraituko dau Hitzetik Hortzera saioak

Bertsogintzako analisiak

Bertsozale.eus-en, astero, bertsogintzearen arlo bati begirako analisia argiaratuko da, idatziz. Irailaren 9an izango da lehenengoa, eguaztenean.

Bideopodcasta

Emun kooperatibeagaz alkarlanean Bidegurutzean bideopodcasta grabau dau Bertsozale Alkarteak. Onintza Legorburu Larrea da saioko gidaria eta, hamabostean behin, kulturgintzearen inguruko ertz bat borobilduko dau gonbidatu biren laguntzaz. Bata, bertsogintzeari lotua egongo da; bestea, ez hainbeste, beste kultur diziplina bateko sortzailea izango baita. Holan, diziplinen arteko alkarrizketa sortuko da.

Grabaketak Mondragon Unibersidadeko Aretxabaletako Humanidade eta Hezkuntza Zientzien fakultatean egin dira. Lehen emisino eguna irailaren 17a izango da, eguenean.