Euskaltzaindiak 'Herria' aldizkarian argitaratutako testuak digitalizauko ditu

| Ikusi handiago | Argazki originala

Euskaltzaindiak eta Herria aldizkaria kudeatzen dauen alkarteak lankidetza-hitzarmena sinatu dabe gaur Baionako Herriko Etxean. Peio Jorajuria Herria alkarteko presidenteak eta Andres Urrutia euskaltzainburuak izenpetu dabe hitzarmena. Akordio horri esker, Euskaltzaindiak 1944tik 2028ko abenduaren 31ra bitartean Herriak argitara emondako eta emongo dituan testuak digitalizetako konpromisoa hartu dau, testu-masa hori erabiltzaileen eskura jarriz.

Herria alkarteak eskubide ez-esklusiboa emoten deutso Akademiari Herria aldizkariaren funtsa erreproduzidu eta jentearen aurrean edozein bitarteko analogiko edo elektroniko erabiliz jarteko. Lagapen hori 20 urterako ezarriko da, gaurtik aurrera zenbatzen hasita, eta mundu-mailakoa izango da. Akordio honi jarraituz, Euskaltzaindiak Herria aldizkariaren funtsa erabili ahalko dau bere proiektu akademikoetan eta Akademiak baimendutako batzorde akademiko edo ikertzaileen proiektuetan.

Andres Urrutia euskaltzainburuak Herria aldizkariaren garrantzia nabarmendu dau gaurko ekitaldian: Ipar Euskal Herrian euskerea eta euskal kulturea hauspotzeko alimaleko ahalegina egiten dau Herriak. Holan, alkarteagaz lankidetzan jardun nahi dogu hamarkadetan moltsotutako altxor hori zabaltzeko, adimen artifizialak eskaintzen dituan erremintak erabiliz. Herriak ondu dauen altxor linguistikoa eta kulturala, kazetaritza egoki eta herritar baten bidez, gizartearen eskura jarriko dau Akademiak, artez moldatutako euskera baten testugintza oparoa eskainiz.

Bere aldetik, Peio Jorajuria Herria alkarteko presidentea eskertuta agertu da hitzarmena sinatu ondoren, eta aldizkariaren ibilbide oparoa gogoratu nahi izan dau ekitaldian: Herria astekariak 80 urtez gorako historia luzea dauka. Besteak beste, Piarres Lafitte, Emil Larre, Jean Hartitschelhar eta Janbattitt Dirassarrek itxitako ondare parebakoa daukagu esku artean, Ipar Euskal Herrian erreferentziazko hedabide bilakatua eta hemendik aurrera be biziarazo nahi geunkena. Gaur Euskaltzaindiagaz izenpetuko dogun hitzarmenak Herria astekariaren argitalpen-funts osoa digitalizetea bideratuko dau, ondoren edonongo euskaltzale guztien eskupean izango dana molde baliogarrienean. Eta Euskaltzaindiak egingo dauen lanaz eskerdun eta ohoratuak gara, gaur egun oraindino astero lantzen dogun altxorrak arabere gehiago distira egingo dauelako lau haizeetara zabaldurik. Jorajuriagaz batera, Menane Oxandabaratz Herria astekariko administrazino kontseiluko kidea be izan da gaur Baionako Herriko Etxean.

Herria aldizkaria: erreferentziazko hedabidea

Herria 1944. urtean sortu zan. Eta helburuen artean euskerea defendidutea eta sustatzea dagoz eta, horretarako, maiztasun aldakorra izan dauen aldizkaria argitaratu dau, tokian tokiko askotariko
testuak sortuz eta euskal hiztunen esku jarriz. Ipar Euskal Herrian, Herria aldizkaria erreferentziazko hedabide bilakatu da, sortu zanetik, aldiko gizartea islatzen dauen tokian tokiko testigantzak jaso eta argitaratu baititu. Era berean, azpimarratu behar da Herriak erabilten dauen hizkuntza-erregistro oparoa, euskerea herriz-herri bizi danaren eta biziarazoten dabilenaren lekukotza ezin ederragoa eskainiz.