Elhuyar Hiztegia: 30 urte eta 75 miloe konsulta

| Ikusi handiago | Argazki originala

Elhuyar Hiztegiak 30 urte bete ditu. Urteotan, hiztegiko berbak, adierak eta adibideak egokitu diran moduan, horreek konsultetako modua be guztiz aldatu da. Hiztegi fisikoak izatetik, konsultak eskuko telefonoan, tabletan eta ordenagailuan egitera pasau dira: esaterako, eskuko telefonoko aplikazinoa 100.000 aldiz baino gehiago deskargatu da eta webguneak astean 150.000 bisita ditu.

Erabilera-datuek argi erakusten dabe proiektua garrantzitsua eta erreferentziakoa dala: Elhuyar Hiztegiaren atzean aditu-talde batek egiten dau lan, eta berbak, adibideak eta oharrak ondo aztertu ondoren txertatzen dira hiztegian. Bestalde, euren ataria (hiztegiak.elhuyar.eus) hiztegi bat baino gehiago da, halanda ze, ondokoa be eskaintzen dau: euskerearen erabilerearen inguruko gomendioak (#ElhuyarrenGomendioak), idazten laguntzeko tresnak (Idazlagun) eta euskerea errepasetako eta hobetzeko olgetak (#HitzJolasa).

Gainera, hiztegia proiektu bizia da: 2025ean, hiru hiztegi elebidunetan (euskerea-gaztelania, euskerea-frantsesa eta euskerea-ingelesa) 2.800 sarrera inguru eguneratu dira. Horreetatik, 2.000 inguru sarrera barriak dira eta beste 800 moldaketak, hainbat arlotan. Eguneraketa horreen bidez, hiztegiaren kalidadea eta erabilgarritasuna hobetu gura izan dira. 

Eguneraketa horreek egiteko, Elhuyar Hiztegiak hainbat iturri erabiltzen ditu. Besteak beste, kontuan hartzen dira Euskaltzaindiaren Hiztegian egindako eguneraketak, erabiltzaileen iruzkinak eta proposamenak eta hedabideetan eta bestelako argitalpenetan agertzen diran berba eta erabilera barriak. Azken horreek Elhuyarrek garatutako hizkuntza-teknologien bidez identifiketan dira.

Bestalde, Elhuyar Hiztegian hizkuntza bardinzalea sustatzea helburu hartuta, 2025eko eguneraketetan genero-ikuspegia jorratu zan.

Elhuyar Hiztegiak 30 urte

Hogeita hamar urte pasau dira Elhuyarren lehen hiztegi elebiduna, euskara-gaztelania hiztegia, kaleratu zanetik. Halanda ze, 1996. urtean hasi eban ibilbidea Elhuyar Hiztegiak. Elhuyar Hiztegiak unean-uneko egoerara eta teknologietara egokitzen jakin dau hasiera-hasieratik; lehen argitalpenean, papelezko edizinoagaz batera, CD-ROM formatua eskaini zan. 1999an, hiztegiak Internetera egin eban salto; hiztegien onlineko ataria gizartearen eskura jarri zan. Ondoren etorri ziran frantsesa-euskerea (2004) eta ingelesa-euskerea hiztegiak be (2007); orain, guztiak dagoz konsultagai webgune bakarrean: hiztegiak.elhuyar.eus. Gainera, 2011n, hiztegien aplikazinoa egin zan, hiztegia eskuko telefonotan eta antzeko gailuetan konsultetako eta 2023an Windows, Linux eta Mac sistema eragileetarako mahaigaineko aplikazinoa.

30 urte honeetan, hiztegiko berbak, adierak eta adibideak egokitu diran bezela, horreek konsultetako modua be guztiz aldatu da.