Maddi Ane Txoperena Iribarreni Maialen Hiribarrenek jantzi deutso txapela

Maddi Ane Txoperena Iribarren eta Maialen Hiribarren. | Ikusi handiago | Argazki originala

Donibane Lohizuneko Jai Alai ganezka egoala, 1800 lagun, final ederra eskaini dau seikoteak (Maddi Ane Txoperena, Maddalen Arzallus, Miren Artetxe, Aitor Servier, Irantzu idoate eta Elixabet Etrxandi).

Maddi Ane Txoperenak eta Maddalen Arzallusek lortu dabe puntu gehien eta eurek kantau dabe buruz-burukoan. Miren Artetxe buruz burukotik kanpo geratu da puntuazinoz bardinduta. Maialen Hiribarrenek jantzi deutso txapela Maddi Ane Txoperenari, baita makila emon be. Alkartea bera osotzen eta indartzen eginiko lana eskertu nahi izan deutso Xilaba Txapelketako atontzaile dan Bertsularien Lagunak alkarteak, izan be, alkartean 15 urtez bolondres lanetan jardun dau Hiribarrenek, gaur egungo ardatzei hauspoa emoten, batez be transmisinoari.

Finaleko sailkapena:

1. Maddi Ane Txoperena_______________1132
2. Maddalen Arzallus_________________1106,5
3. Miren Artetxe______________________684,5
4. Aitor Servier______________________682
5. Irantzu Idoate_____________________664
6. Elixabet Etxandi___________________606,5

Gai-emoile lanetan Amaia Castorene eta Aritz Bidegain ibili dira. Zazpi epailez osotutako epaimahaia izan da bertsolarien lana epaitzeaz arduratu dana: Zuhaitz Olazabal, Maialen Berra, Eneko Bidegain, Iban Thicoipe, Abel Zabala, Ainhoa Sarasua eta Jon Garmendia Txuriya. Idazkari lanetan, barriz, Oihana Aranguren ibili da. Xilaba bertsolari txapelketa amaitu bada be, 2026ko Euskal Herriko Bertsolari Txapelketan bost finalistek hartuko dabe parte.