58,2 miloe euro bideratuko ditue euskerea ikasteko

| Ikusi handiago | Argazki originala

Hizkuntza Politika sailburuordeak, Aitor Aldasorok, hasierea emon deutso 2025-2026 ikasturtean euskaltegietan matrikuletako kanpaineari Antiguako AEK Euskaltegian (Donostian), bertako zuzendariagaz, Amaia Irastorza, ikasle bikaz, Claire Tonnelė eta Daniel García, eta euskerearen sustapenari lotutako hainbat eragileakaz batera.

Kanpainea Besarkatu euskara lelopean jarri da martxan. Halanda ze, kanpainearen helburua herritarrak euskerara gerturatzea da, besarkadea emotea jarrera eta emozino positiboen bidez. Aldasorok adierazo dauenez, besarkadea emotea gertutasuna eta emozinoa adierazoten dituan ekintzea da eta, era berean, ateak edegiten dituana. Euskerara hurreratzea be jarrerea dala adierazo gura dogu kanpaina horren bidez, milaka aukeretara ateak edegiten dituana: hartu-emonak, bizipenak, lan aukerak... Euskerea gizarte-kohesinorako giltza dala sinisten dogu eta, kanpaina horren bidez, batez be, euskerea ezagutzen ez daben personak erakarri nahi ditugu, gure hizkuntza eta kulturea ezaguu deien.

Euskerea ikasteko 58,2 miloe euro 2025-2026 ikasturtean

Hizkuntza Politika sailburuordeak adierazo dau Eusko Jaurlaritzeak erraztasunak emoten jarraituko dauela euskerea ikasteko. Holan, 2025-2026 ikasturtean euskerea ikasteko laguntzetara 58,2 miloe euro bideratuko dirala azpimarratu dau Aldasorok: gobernuarentzat euskerea ikastea eta erabiltea estrategikoa da eta, horregaitik, euskerea ikasteko bideak bermatzen, edegiten eta laguntzen jarraituko dogu, euskerea ikastea erraza izan daiten eta guztientzat eskuragarri.

Hiru laguntza lerro dagozala adierazo dau sailburuordeak:

• Euskaltegiei zuzendutako dirulaguntza lerroak. Euskaltegi pribatuei zuzendutakoa, 36,2 miloe eurokoa izango da ikasturte honetan eta Gobernu Kontsejuak irailaren 9an onartu eban. Aldiz, Euskaltegi publikoen deialdia 14,1 miloe eurokoa izango da. Guztira, euskaltegien deialdietara 50,3 miloe euro bideratuko dira 2025-2026 ikasturtean.
• Hasierako A1 mailatik hasi eta C2 aditu mailara bitartean, mailea gainditu eta egiaztatzen daben ikasleentzat dirulaguntza deialdira 2.975.000 euro bideratu dira 2025 urtean.
• Euskerea ikasteko dobakotasun-programa deialdira 4.860.000 euro bideratuko ditu Jaurlaritzeak ikasturte barri honetan, igaz baino % 52,9 gehiago. Lerro horri esker, 2025-2026 ikasturtean, oinarrizko A1 eta A2 mailetako ikasleentzat eta C1 mailan komunikazino-gaitasun maila hobetu gura daben 16 eta 18 urte bitarteko gazteentzat, euskaltegiko matrikulea ia doban izango da: hasieran matrikula sinbolikoa ordainduko dabe (kopuruaren laurena baino gitxiago) eta ikasturtea amaitzean kopuru hori berreskuratzeko aukerea izango dabe.

Aldasorok azpimarratu dau Gobernuak euskerea ikasteko erraztasunak emoteko dauen konpromisoa sendoa dala, HABE horretarako tresna eta bidea baita. Horregaitik, azken urteetan (2022 – 2025) HABEra bideratutako diru partidea % 21 igon dala zehaztu dau sailburuordeak, konpromiso horren erakusle. Aurrekontua 68 miloe eurokoa da.

% 30eko igoerea A1 mailako ikasleetan, dobako-programeari esker

Euskerea ikasteko dobako-programearen helburu nagusietako bat oinarrizko mailetako ikasleentzat euskerea ikastea errazago eta merkeago izatea dala adierazo dau Aldasoro sailburuordeak eta 2024-2025 ikasturtean hasierako A1 mailan ezarritako programa horrek izandako bilakaerea nabarmena izan dala azpimarratu dau.

Datuei erreparauta, 2023-2024 ikasturtean 4.942 ikasle ibili ziran A1 mailan eta, aldiz, ikasturte horretan (2024-2025) 6.376 ikasleek ikasi dabe maila horretan. Igoerea ia % 30ekoa izan da.

Horrezaz gan, euskaltegietan euskerea ikasi daben ikasle guztien ia % 16ak A1 mailan ikasi eban 2023- 2024an; aldiz, ikasturte horretan ikasle guztien ia % 20 ibili da maila horretan ikasten. Holan, euskaltegietan gero eta ikasle gehiago dago oinarrizko mailetan eta dobako programa horren bidez A1 mailan ia 5 puntutan igon da ikasleen indar erlatiboa ikasle guztiekaz alderatuz.

Etorkinak be sano garrantzitusak dira maila horreetan. Egun, euskategietan ikasten dagozan ikasleen % 20 etorkinak dira: A1 mailan dagozan ikasle kopuruaren gehiengoa, % 62, etorkinak dira: horreetatik, % 42 inguru beste autonomia erkidegoetatik etorritako herritarrak eta % 56, atzerritik etorriak.