Donamaria, Mundaka eta Mutiloa UEMAra batuko dira

Mundaka eta Mutiloa. | Ikusi handiago | Argazki originala

Mundakako Udalak gaur, hilak 14, goizeko 10:00etan dau maiatzeko udal osoko bilkurea egiteko deialdia. Aztergaien artean dago UEMAko kide izateko eskaerea. Pasa dan astean aztergai izan eban gaia batzordean, proposamenak aurrera eginez. Beraz, gaurko udal osoko bilkuran be aldeko botoak nagusitzea eta Mundakako Udala UEMAko kide bihurtzea aurreikusten da.

Mundaka Bizkaiko iparraldeko udalerria da, Busturia eskualdean dago, kostaldean eta 1.828 biztanle zituan igaz. Mila soziolinguistikoan udalerri euskalduna da baina alde handia dago euskerearen ezagutzearen, euskera gaitasunaren eta kaleko zein etxeko erabileren artean.

Mutiloako Udalak, barriz, gaur arratsaldean (hilak 14) egingo dau udal osoko bilkurea eta hor be UEMAko kide izateko eskaerea onartzea espero dabe.

Astelehenean egin eban udal osoko bilkurea Donamariako Udalak. Udal gobernua osotzen daben Herriarengaitik taldeko zinegotzi guztien aldeko botoekaz, UEMAko kide izatea erabagi eben. Euskaldunen indizea %89,2 da Donamarian, baina azken urteotan ezagutza apaltzen dabil. Euskaldunen profila aldatzen dago eta buruko minak sortu dabe lehen hizkuntzearen eta etxeko erabilerearen datuek.

Donamaria Nafarroa iparraldeko herria da. Malerreka eskualdean dago eta igaz 452 biztanle zituan.

Gipuzkoako udalerri euskalduna da Mutiloa. Goierri eskualdean dago eta igaz 253 biztanle zituan.

UEMAren batzar nagusia, bagilaren 14an, Azkoitian

UEMAk bagilaren 14an egingo dau aurtongo lehen batzar nagusia, Azkoitian, Baztartxo Antzokian. Mankomunidadeak orduan onartuko ditu UEMAko kide izateko herri barrien eskaerak. Beraz, egun horretatik aurrera izango dira Mundaka, Donamaria eta Mutiloa UEMAko kide.