Korrika-AEK Bekearen helburua da euskerea eta euskal kulturea bultzatzea

Ane Elordi, Xanti Agirrezabala, Erika Olaizola eta Lurdes Etxezarreta. | Ikusi handiago | Argazki originala

III. Korrika-AEK Bekearen aurkezpena egin dabe gaur goizean Lurdes Etxezarreta, AEK Nazino Kontsejuko kideak, Korrikako arduradun Ane Elordik eta Kaka proiektuko Erika Olaizola eta Xanti Agirrezabala aktoreek.

Lurdes Etxezarretaren adierazpenak

Euskal Herriko biztanle guztiak euskeraz eroso bizitea. Horregaitik, beharrezkoa da eremuak sortzea, lantzea eta alkarlotzea.

Jakitun gara eremu horreek ez dirala bat-batean lortuko, baina ahalegin horretan dabil, hain zuzen be, AEK.

Sorkuntzaz, euskal kulturaz eta euskal sortzaileez berba egiteko eguna da gaur. Orain pare bat aste 7Kn Ødei euskal raperoari egindako alkarrizketako esaldi bat nabarmendu gura dot: -Kulturea gitxitu bat sistemearen parametroetan lehiatu daiteke haren buruari kalte egin barik?- galdetu eutsien, azken aldiko kontzertu handien harian. Haren erantzuna ondokoa izan zan: -Oasiaren kultura da nagusi. Gauza bera pasetan da Korrikagaz, Herri Urratsegaz... Oasiak sortzen ditugu, urte osoko desertuei ez heltzeko-.

Guk Korrika dan oasi horren indarra eta ekarpen ekonomikoa erabiten ditugu egunero eskolak emoteko, praktika jarduerak egiteko, ekitaldiak atontzeko. Beraz, Ødeik aitatzen dauen urte osoko desertua oasi txikiz beteten saiatzen gara. Gure oasiak erabili behar doguz basamortua ureztatzeko.

III. Korrika-AEK Bekearen bidez, AEKek hiru helburu betetzen ditu: euskal kultur sorkuntzean eragile izatea; kultur arloan euskal herritarrentzako euskeraz eroso ibiltzeko espazioak sortzea, garatzea eta alkarlotzea; eta, euskal sortzaileei gune horreek eskaintzea.

Ane Elordiren adierazpenak

Korrika-AEK kultur sorkuntza bekearen III. Deialdia aurkeztu nahi dogu. Euskerea eta euskal kulturea bultzatzea dira helburuak.

Aurreko ikasturtean, -Kaka- lanak eskuratu eban bekea (Xanti Agirrezabala eta Erika Olaizola).

Korrikak ez dau euskerea lasterketeak irauten dauen bitartean bultzatzen, izan be, jarduera ugari egiten ditugu urtean zehar. Beraz, euskeraz bizi ahal izateko aukera asko dagoz.

Eskualdeetako programazinoak osotzeko, Menua izan dogu. Korrika webgunean dozue dagoeneko ikusgai, eskaintza osoa eta diziplina guztiak modu errazean topetako. Hemendik, konbita egiten deutsegu euskal kulturako artista eta sortzaileei menura batu daitezan.

Kulturareagaz zerikusi zuzena dauen euskerea eta Korrikaren gaineko dokumentala produziduten gagozala dinotsuet eta, horretarako, apirilaren 25era arte dagoan Jalgi Hadi crowdfunding kanpainea gabiz aurrera eroaten, 30.000 euroko gitxieneko finanziazinoa behar dauena. Dagoeneko 18.184 euro lortu doguz. Gure esker ona adierazo nahi deutsagu euskal jente-arteari.