Mejillon Tigre, Hitzetik Hortzeran

| Ikusi handiago | Argazki originala

Eider Adeletx eta Ane Zubeldia Mejillon Tigre kolektiboko kideak dira. 2022an Hitz Hibridoak bekeari esker sortu eben Hitz esana poesia errezitaldia. Hiru urteko ibilbidearen ondoren, maiatzean amaituko dabe birea. Errezitaldiaren ibilbideari buruz berba egiteko alkartuko dira Mirari Martiarenagaz.

Hitz esana ikuskizuna definiduteko kontzeptu ugari erabili diran arren, spoken worda egiten dabe Eider Adeletx eta Ane Zubeldiak. Poesia mueta horretan eroso sentiduten dira, beraz, egin nahi eben hori zelan lortu daben kontauko dabe. Ganera, poemak sortzeko prozesua, zeri buruz idatzi, zelan gorpuztu eta oholtzaratu be izango dira berbagaiak.

Spoken wordak edo Hitz esanak bertsolaritzeagaz dituan antzekotasunei buruz be ibiliko dira; baita Mejillon Tigreren saioetan inprobisazinoaren indarraz eta behin birea amaituta hartuko daben bideaz be.

Iruñeko eta Oiartzungo bertsoaldiak

Bertsoaldiek be izango dabe tartea aste honetako programan, betiko lez. Alde batetik, Iruñeko Zabalgune auzoko bertso afaria emongo dabe. Garazi San Martinek egin zituan gai-jartzaile lanak eta Saioa Alkaiza eta Sustrai Colina ibili ziran bertsotan.

Beste alde batetik, Oiartzunen egin zan PUF bertso-saio musikatua emongo dabe, Literaturan plaz(a/e)ra ekimenaren barruan egin zana. Bertsotan ibili ziran Alaia Martin, Amets Arzallus eta Miren Artetxek; gai-jarten, Ainhoa Urien; eta, Bastien Marianne eta Patxi Amulet musikarien ardurea izan zan musikea.

Hitzetik Hortzera: zapatuan, 21:00etan, ETB1en.