Hatortxu Rockek Latzen, Afu, Skatu eta Alaitz eta Maider taldeen bueltea iragarri dau

Afu taldea (Argazkia: Hernaniko Udala). | Ikusi handiago | Argazki originala

Latzen, Afu, Skatu eta Alaitz eta Maider taldeak bueltan dira barriz Hatortxu Rocken. Halanda ze, 30. edizinoagaz agur esango dauen euskal presoen aldeko jaialdiak, izen gehiago batu ditu orain artekoei: Buitraker, Autobus Magikoa, Never Surrender, Tatxers, Dupla, Skabidean, Chulería, Joder!, Gatibu, Brigade Loco, Non Servium, Sukena, Bulego, La Jodedera, Ibil Bedi, Süne, Kaotiko, Banda Bassotti, Betagarri, Eñaut Elorrieta, Gozategi…

Jaialdia Lakuntzan izango da, garagarrilaren 24tik 27ra arte. Sarrerak hemen dagoz eskuragarri.

Latzen

Latzen (Oñati, 1993) taldeak, maketa bat eta disko bi kaleratu zituan 1999an banandu aurretik. 2007an, barriz, laukoteak itzulera birea egin eta hori jasotzen eban diskoa, Hellmuga, kaleratu eban. Orain, 17 urte geroago, Lakuntzan izango dira.

Afu

Afu (Barañain, 2007) salsa-reggae taldea da. Lehen diskoa, 2015an kaleratu eben, Zoroak hegaz doaz; bigarrena, barriz, Larruazelean izenekoa, 2020an. Halanda ze, azken kontzertua euren herriko plazan emon eben 2023an, AFU azken dantza izenpean. Taldearen laugarren aldia izango da Hatortxu Rocken.

Skatu

Skatu (Iruñerri, 2007) ska-reggae taldeak, zortzi urte ostean amaitutzat emon eben ibilbidea. Beraz, 2015ean izan zan taldearen azken kontzertua, Hatortxu Rockeko 18. edizinoan hain zuzen be.

Alaitz eta Maider

Alaitz eta Maider (Oiartzun, 1989) bikoteak trikiti-pop erremitoak jo zituan 1989tik 2004ra. Hamarkada bi pasau ostean, barriz igoko dira oholtzara, Iruñeko Burutik taldeak lagunduta.