Zeidfest Gaztearen eta bertara joango diranen omenaldia jasoko dau AEKk Barakaldon

| Ikusi handiago | Argazki originala

AEKren esku egongo da aurtengo edegiera ekitaldia, eraikineko sarrera nagusian goizeko 11:00etan. Ateak edegi eta bertan batutako lagun guztiak Kittu elektrotxarangearen konpainian sartuko dira BECen, laugarren pabilioiraino. Txarteldegiaren parean egongo da jaialdia inauguretako ebagi beharreko zintea eta han egingo deutse ondoetorria AEKren Nazino Kontseiluko kide Lurdes Etxezarretak eta Barakaldoko AEKko zuzendari Argiñe Sangradorrek. Berbaldi labur baten ostean, Sangradorrek zintea ebagi eta hori izango da festibalaren hasiera ofiziala.

AEKk eskertu egin dau Zeidfest Gaztearen omenaldia, jaialdi hau euskal musikaz, giro onean, eroso, libre eta euskeraz egiteko gunea dalako. Hain zuzen be, Euskal Herriko biztanle guztiak euskeraz eroso bizitea da AEKren helburua eta horretan dabil egunero bere euskaltegietan, handik urtetean, ikasleak gure hizkuntzea arlo guztietan erabilteko aukerea izan deien: lagunartean, familian, lanean, aisialdian...

Hori dala eta, AEKk animau egin ditu gure irakasle, ikasle, berbalagun eta gainerako AEKideei eta euskaltzale guztiei, euskeraz eroso biziteko gune horretan alkarregaz disfrutau deien. Non eta Barakaldon, Euskal Herriko gune erdaldunetako batean: Gogoan ditugu, batez be, Barakaldon, Ezkerralde osoan eta, Ezkerraldean bezela, Euskal Herriko gunerik erdaldunenetan euskerea ikasten dabizen ikasleak; zorionez, horreen guztien ahaleginari esker, gero eta ohikoagoa dalako euskeraz eroso biziteko guneez gozetea. Horregatik izango dau Barakaldoko AEKko zuzendariak zintea ebagiteko ohorea. Datorren zapatuan, izan daitela BEC euskaldunon eta euskaltzaleen arnasgune!

Aize Otaño, AEKren Nazino Kontseiluko kideak nabarmendu dauenez, guretzat plazer eta ohore handia da, Jaizkibel konpainiaren eta Naizen Alkartearen lekukoa hartuta, jaialdiaren omenaldia jasotea eta apirilaren 5ean ateak edegiteko ekitaldian parte hartzea.

Jakina danez, AEKren helburua da Euskal Herriko biztanle guztiak euskeraz eroso bizitea eta, esangura horretan, gure ikasleak euskaltegietatik urtekeran gure hizkuntzea arlo guztietan erabilteko aukerea izatea nahi dogu eta Zeidfest Gaztea jaialdiak horretarako aukerea emoten dau.

Lurdes Etxezarreta (AEKren Nazino Kontseiluko kidea): omenaldia AEKko euskaltegietan egunero euskerea ikasten dabizen milaka euskara-ikasleentzat izatea gura dugu, Oskorriren Euskaldunbarriaren balada kantuaren letrak dinoan lez, goizero, goizero AEKn bezero, batzuetan ero, besteetan bero dabizan horreentzat guztientzat.

Kantu horren hasiereak ondokoa dakar: Barakaldokoa naiz eta daukat paro obrero, horregatik euskaltegira noa ni egunero.... Bada, Zeidfest Gaztea Barakaldoko BECen izango danez, nabarmendu gura ditugu Barakaldon, Ezkerralde osoan eta, Ezkerraldean bezela, Euskal Herriko gunerik erdaldunenetan euskerea ikasten dabizan ikasleak; euskaraz eroso biziteko guneak sortzea hain erraza ez dan lekuetan horreek sortzen dabizanak. Ezkerraldeko gure lau euskaltegietan (Santurtzi, Portugalete, Sestao eta Barakaldo), esaterako, mila ikasle inguru dabiz euskerea ikasten, eta 500 bat berbalagun kalean euskerea praktiketan.

Sarri egiten dogu berba euskerearen arnasguneei buruz; bada, zorionez, horreen guztien ahaleginari esker, gero eta ohikoagoa da Bilbon, Ezkerraldean, Arabar Errioxan, Erriberan edo Enkarterrin arnasguneak topetea, hau da, euskeraz eroso biziteko guneez gozetea.