Apirilaren 5ean jokatuko da Kuadrillarteko finala

Bizkaie! 2025-04-02 08:32   Bertsolaritzea

Goizeko 11:30ean hasiko dira lau taldeak, Gasteizko Eskibel Plazan.

Urtarrilaren 18an emon jakon hasierea Kuadrillartekoari. 8 eskualdetan banatuta 14 bertso egun izan dira Araban zehar lehen fasean. Bigarren fasean, barriz, 4 finalerdi eta falta dan finala. Holan, finalerako txartela finalerdi bakotxeko irabazleak lortu dau; Lautadako 4 gara, Gasteizko Pinto pintto, Aiaraldeko Altubepekoak eta Gorbeialdeko Arlobiko bardoak.

Arabako VIII. Bertso Kuadrillarteko finala, beraz, zapatuan, apirilaren 5ean, izango da Gasteizen. Goizeko 11:30ean hasiko da lau taldeen arteko finalaurrekoa Eskibel Plazan eta talde bi pasauko dira finalera.

Bazkaria, 14:00etan Conde de Álava jatetxean izango da eta horren ostean, goizean finalera sailkatutako talde bien artekoa jokatuko da, arratsaldeko 16:30ean.

Ondorengo ariketa honeek egin beharko ditue bertsolariek finalean:

- Goizeko saioa.

  • Taldekako agurra. A, B, D eta gero E.
  • Ofizinoa 8ko handian. A taldeko batek B taldeko bategaz ofizinoka zortziko nagusian hiruna bertso (bardintasunetik) (6 bertso). D taldeko batek E taldeko bategaz ofizinoka zortziko nagusian hiruna bertso (bardintasunetik). (6 bertso).
  • Puntuka. Talde bakotxeko kide bat zortzi bertso zortziko txikian osotu arte librean (4 talde bakotxa, danera 8).
  • Ofizinoa 8ko txikian. B taldeko batek D taldeko bategaz ofizinoka zortziko txikian hiruna bertso (kontrakotasunetik) (6 bertso). E taldeko batek A taldeko bategaz ofizinoka zortziko txikian hiruna bertso (kontrakotasunetik). (6 bertso).
  • Puntu biri erantzun zortziko txikian: A taldeko bertsolariak B taldeko bertsolariari; B taldeko bertsolariak D taldeko bertsolariari; D taldeko bertsolariak E taldeko bertsolariari; eta, E taldeko bertsolariak A taldeko bertsolariari (danera 8).
  • Koplaka. Gaia emonda, talde bakotxeko lagun bat, hiruna kopla musikeaz lagunduta. (bardintasunetik). (Altxa kopla hori! egitasmoan erabilitako doinuak: guantanamera, joanna give me hope, no woman no cry, John zaharra, guretzat berdin dira, egun da Santimamiña...). (12 bertso danera).

- Finala.

  • Agurra (ez puntuagarria).
  • Aurrekoak atzekoei. B taldeko batek A taldeko hiruri eta gero alderantziz (A taldeko batek B taldeko hiruri), gai emonda, aurrekoak 3 bertso zortziko handian, eta atzekoek bertso bana (6 bertso talde bakotxak, danera 12) (gai bi). B eta gero A.
  • Ofizinoa hamarreko txikian. B taldeko batek A taldeko bategaz ofizinoka hamarreko txikian hiruna bertso (kontrakotasunetik). (talde bakotxak 3 bertso, 6 bertso danera).
  • Ofizinoa seiko motzean, A taldeko bat B taldeko baten kontra (hiruna bertso, danera 6).
  • Ipuina. Hiru poltsa egongo dira: poltsa batean personaiak egongo dira; bigarrenean espazioa/kokalekuak eta hirugarrenean objektuak. Talde bakotxeko hiru bertsolarik parte hartuko dabe. Lehenengoak personaien boltsatik papela hartu eta kantatuko dau bertsoa. Bigarrenak personaia horri kokaleku boltsatik papel bat hartu eta bertsoa kantauko dau. Eta, hirugarrenak, ipuina biribilduko dau objetuak boltsatik hartutako papelaregaz bertsoa osotuz (8ko handian).
  • Ganbara. Puntuka zortziko txikian sei bertso osotu arte talde bereko hiru bertsolariekaz kartzela egoerean. Gaia apainduta egongo da mozorroekaz edo behar diran materialekaz egoera kontestualizetako.
  • Segidilla taldekide guztien artean, 3 minutu.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu