Gazako emakumeei laguntzeko hitzarmena sinatu dabe

Barbara Ruiz Balzola eta Ana Otadui Biteri. | Ikusi handiago | Argazki originala

Bizkaiko Batzar Nagusiak erakundeak eta UNRWAko Espainiako Batzordea Alkarteak (UNRWA Euskadi) lankidetza-hitzarmena sinatu dabe, nazinoarteko lankidetzea, ekintza humanitarioa eta gazatarren aldeko sensibilizazinoa indartzeko, emakumeei eta neskei laguntzeko batez be. Akordioa Ana Otadui Biteri Bizkaiko Batzar Nagusietako buruak eta Barbara Ruiz Balzola UNRWA Euskadiko arduradunak sinatu dabe, Bizkaiak nazinoarteko alkartasunao, bardintasuna eta justizia globalaren aurrean dauen konpromisoa indartzeko ekitaldian.

Akordioak kontzientzia solidarioak gizartean izandako hazkunde nabarmena dau ardatz. Halanda ze, Nazino Batuek adierazotako % 0,7 betetea eskatzen deutse erakunde publikoei, baita garapenerako lankidetza-programak eraginkortasunez kudeatzeko beharra be. Bizkaiko Batzar Nagusiak bardintasunagaz konprometiduta dagoz eta hitzarmen horren bitartez baliabideak lehentasunez emakumeen eta nesken mesederako proiektuetara helduko dirala bermatu gura da, askotan horreek diralako gerra egoeretan bidebakokerien eta dezbardintasunen eragina gehien jasaten dabenak. Akordioa Bizkaiko Batzar Nagusietako II. Bardintasun Planean adostutako ekintzen barruan dago.

Ana Otadui Biteriren eretxiz, hitzarmen horrek genero bardintasunagaz eta emakumeen eta nesken ahalduntzeagaz dogun konpromisoa indartzen dau. Gure laguntza gehien behar dabenakana modu eraginkorrean heltzea bermatu gura dogu, batez be garapen integrala sustatzen daben proiektuetara zuzenduz.

Barbara Ruiz Balzolak, barriz, erakundeen arteko lankidetzearen garrantzia azpimarratu dau, emakumeen eta nesken bizitzetan benetako eragina lortzeko: akordio horrek eskualdean egiten dogun lana indartzeko eta gure proiektuek Palestinako errefuxiatuen alde daben eragina handitzeko aukerea emongo deusku.

Bizkaiko Batzar Nagusiak erakundeak 60.000 euro bideratuko ditu 2025ean UNRWA Euskadiren proiektuak finantzietako. Ekarpen hori Gazan laguntzea emoteko eta berreregiteko ekimenak ezartzeko lagungarria izango da, baita Euskadin biztanle palestinarraren egoereari buruzko sensibilizazino-kanpainak egiteko be.

Hitzarmenak ondoko printzipio honeetan oinarritutako epe luzerako lankidetza-esparrua zehazten dau: alkartasuna, jaubetzea, laguntzea, koordinazinoa, erantzukidetasuna eta egiturazko laguntzea, zeharkako genero-ikuspegiagaz. Erakunde biek alkarregaz behar egiteko konpromisoa hartu dabe, komunidade onuradunetan emakumeen eta nesken premina espezifikoei erantzungo deutseen lankidetza-proiektuak identifiketako eta babesteko.