ESASek musikaz beteko dau Gurutzetako Ospitala

Puy Barral eta Garazi Navas. | Ikusi handiago | Argazki originala

Musikea, ondoizaterako tresnea, Itxaropenaren harmoniak zikloko protagonista bihurtuko da barriro be, zapatuan, zezeilak 22, Gurutzetako Ospitalean. Zikloaren lehen kontzertua urtarrilaren 25ean izan zan, artea errealidade soziosanitarioagaz konektetako eta pazienteen, senideen eta osasun langileen bizi kalidadea hobetzeko. Programeak, onura kulturalak agerian ixten ditu. INAEM - Arte Eszenikoen eta Musikearen Institutu Nazinonalaren babesa dau.

Kontzertuak ospitaleko hainbat espaziotan egiten dira. Lotura emozinola sustatzea eta estresa arintzea dira helburuak; batez be, ZIUn (Zainketa Intensiboetako Unidadea), errekuperazino prozesuan eta gaixotaxun kronikoan dituen personetan. Hori guztia, emakume artista eta sortzaileen lana ikusarazoz.

Zapatuan, zero solairuan, akordeoilari bat eta poeta bat izango dira, Garazi Navas eta Puy Barral hurranez hurran. Errezitaldiak poesia eta musikea buztartzen ditu, errenazimentutik gaur egunera arteko ibilbidea eginez. Berton, euskal literaturako lehen poeten ahotsak nabarmentzen dira.

Musikea gizartean eragin positiboa sortzeko dauen gaitasunean sinesten dogu. Gure proiektuak, Gurutzetan, kalidadezko musika esperientzietarako sarbidea emoteaz gan, ospitale prozesuak humanizatuko dituen topalekuak sortu nahi ditu. Gure interpreteen, konpositoreen eta kolaboratzaileen laguntzinoakaz, eraldaketa sozialaren alde egiten jarraitzen dogu, musikearen eta komunidadeekiko konpromisoaren bidez, adierazo dabe kolektiboko kideek.

Hurrengo datak

• Martiak 29: Femm Jazz Bokala. 2. pisuan.
• Apirilak 26: Elaine Ensemble (hirukotea: biolina, biola eta fagota). 2. pisuan.
• Maiatzak 31: Hirukotea soka: Oroimen. 2. pisuan.
• Bagilak 28: Nuria Lopez gitarristea. 10. pisuan.

ESAS Classics

ESAS (Emakume Sortzaile eta Artisten Sarea) 2021eko martiaren 8an sortu zan profesionalen sarea da. Musika klasikoaren esparruan emakumeen lana ikusarazoteko lan egiten dau. Emakume asko dira funtsezko roletan dagozenak, besteak beste, zuzendaritzean, produkzinoan edo konposizinoan eta horreen lanak gitxitan sartzen dira programazinoetan. Halanda ze, ESASek topaketa kulturalak atontzen ditu ikuspegi femeninoagaz, emakumearen figureari lehentasuna emonez.