Zirika Zirkusek edegiko dau Deustualdeko Clown Jaialdia

Zirika Zirkus. | Ikusi handiago | Argazki originala

Bilboko Udalak Deustualdeko Klown Jaialdiaren laugarren edizinoa atondu dau. Berton, lehen mailako clown ikuskizunak eskainiko dira zezeilaren 7tik 26ra, eguazten eta barikutan. Deustuko eta San Inazio – Ibarrekolandako Udaltegiek hartuko ditue emonaldiak eta sartzea doban izango da lekua bete arte.

Programa honen helburua da clowna mueta guztietako publikoari hurreratzea eta Euskadin tradizino handia dauen diziplina horri balioa emotea. Clown antzerkian ibilbide luzea egin daben konpainia asko ditugu, euren lan eta ahalegin eszeniko guztia umorea egiteko modu horretan iraultzen dabenak. Ez da umeen kontua bakarrik, clowna modu sakon eta osoan hurreratzen da gazte eta helduengana. Barre egitea, batzuetan gatxa izan arren, oso atsegina eta askatzailea da, adierazo dabe  Bilboko Udaleko Kultura Sailetik.

Laugarren edizinoko egitarauak clown eta keinu antzerkian ibilbide luzea daben sei konpainiaren ikuskizunak batzen ditu. Horreetako hiru Euskal Herrikoak dira (Bea Larrañaga, Zirika Zirkus eta Xilipurdi), beste bat Valentziakoa (Ameba Teatre) eta nazinoarteko bi (Mundo Costrini, Frantzia-Argentinakoa, eta Cia a Nariguda, Portugalgoa).

Ekimena Clown Zorrotza egitasmoaz osotzen da. Programa horrek aire zabaleko obrak eskaintzen ditu udabarrian, tokiko, estaduko eta nazinoarteko konpainien muntaketekaz eta proposamenekaz.

Programazinoa

• Zezeilak 7, 18:00etan: San Inazio - Ibarrekolanda Udaltegia. Zirika Zirkus (Nafarroa): Eolo 68.
• Zezeilak 12, 19:00etan: Deustuko Udaltegia. Mundo Costrini (Frantzia-Argentina): Humanus Comicus.
• Zezeilak 14, 18:00etan: San Inazio - Ibarrekolanda Udaltegia. Ameba Teatre (Valencia): El día de Ramiro.
• Zezeilak 19, 19:00etan: Deustuko Udaltegia. Cia a Nariguda (Portugal): La ceremonia.
• Zezeilak 21, 18:00etan: San Inazio - Ibarrekolanda Udaltegia. Xilipurdi (Euskadi): Pepa eta Kutxo.
• Zezeilaren 26, 19:00etan: Deustuko Udaltegia. Bea Larrañaga (Euskadi): Filipa Balbina (Klown emakumeak historian).