Lesakako Bertso Eguna berbagai Hitzetik Hortzeran

| Ikusi handiago | Argazki originala

Bortzirietako Lesaka herriak hartu dau aurtongo Bertso Eguna. Egun osoko egitarauean, bertsoak eregitako zubiak ezagutzeko aukerea izan eben bertaratutakoek. Halanda ze, zubi horreek eroango ditu ikus-entzuleen etxeetara aste honetako Hitzetik Hortzerak.

Lesakako bertsolaritzearen zubiak ederki ezagutzen ditu Estitxu Fernandezek eta haregaz alkartuko da Mirari Martiarena.

Tantirumairu Ikastolan heldu zan bertsoa Fernandezen bizitzara eta, ondoren, Manolo Arozenak eta Bittor Elizagoienek martxan jarritako bertso-eskolean hasi zan. Nafarroako bertsolari belaunaldi gazte taldeko kide izan zan, besteak beste, Amaia Telletxea, Estitxu Arozena, Iñigo Olaetxea eta Xabier Silveiragaz batera. Bereziak izan ziran eurentzat 1995an Estitxu Arozenak irabazitako Nafarroako txapela, baita 1997an Xabier Silveirak irabazi eban lehena be.

25 urtera arte ibili zan bertso plazan Estitxu Fernandez eta jentaurreko bertsolaritzea itxi arren, gaur egun haren bizitzean dauen lekuaz berba egiteko aprobetxauko dabe Fernandezek eta Martiarenak.

Bertso Eguneko jaialdia eta afalondorengo bertso jarriak

Lesakako Harriondoa kultur etxean egin zan Bertso Eguneko arratsaldeko jaialdia: XXI mende, 25 (H)illbetz. Alaitz Rekondo ibili zan gai-jartzaile lanetan eta bertsotan, barriz, ondokoak: Alaia Martin, Amets Arzallus, Julio Soto, Maddi Ane Txoperena, Maialen Lujanbio eta Peru Abarrategi.

Arratsaldeko jaialdiaz gan, Bertso Egunean Lesakako Linddurren Borda sagardotegian egin zan afalondorengo bertso jarrietako batzuk be ikusteko aukerea izango da programean. Lesakako bertsolaritzeari lotutako bertsoak kantau ebezen Hor gu taldekoek, Manex Pagola musikarian laguntzinoagaz.

Hitzetik Hortzera: zapatutan, 21:00etan, ETB1en.