Borja Cobeagaren 'Los aitas' filma martiaren 21ean estreinauko da

| Ikusi handiago | Argazki originala

Bteam Picturesek Los Aitas filma estreinauko dau martiaren 21ean. Borja Cobeagak (Pagafantas, 8 apellidos vascos, No me gusta conducir) zuzenduta, 80ko hamarkadearen amaieran Bilbon girotutako road movie berezia da. Horretan, hainbat gurasok euren alabak eroan beharko ditue gimnastika erritmikoko txapelketa batera Berlinera.

Quim Gutiérrez (El cuerpo en llamas, Amor de madre, Primos), Juan Diego Botto (En los márgenes, No me gusta conducir) eta Ramón Barea (Cinco lobitos, García y García) dira filmeko protagonistak. Sofía Otero, Irati Goitia Arraibi, Mara Garcés Renedo, Vera López Monreal, Irati García Pérez gazteek eta Aitor Sanz aktoreak be parte hartzen dabe filman. Aurrekoakaz batera ondoko honeek izango dira: Iñaki Ardanaz (Ane, Ana de día), Mikel Losada (Ane, García y García) eta Laura Weissmahr (Salve Maria).

Los Aitas Inicia Films, BTeam Prods eta Sayaka Producciones etxearena da, Belgikako Umedia enpreseagaz koprodukzinoan eta ICEC, Movistar+, RTVE, EITB, TV3, ICAA eta Eusko Jaurlaritzearen babesari esker egindakoa.

Cobeagak Valentina Visoregaz (La Voluntaria, Uno para todos) batera idatzi dau gidoia eta proiekturako idearen jatorriaz berba egin dau: 1989an, Los Aitas girotuta dagoan urtean, 12 urte nituan. Filmako neska protagonistek adin hori dabe. Aita naz eta hau da aitatasunari buruz idazten dodan lehenengo gidoia, baina konturau naz istorioa batez be seme edo alaba izateari buruzkoa dala. Aitatasun ereduak nire aitaren belaunaldiaren eta nirearen artean izan eban aldaketeari buruzkoa. Barrea eragitea dau helburu. Inoiz ez dot hain film koralik egin, halanda ze, hori izan da erronketako bat. Ganera, inoiz ez dot neska-mutiko protagonistakaz lan egin. Laura Weissmahregaz lan egiten dodan lehen aldia da eta ezin hobea da entrenatzailearen rolerako. Horrezaz gan, seigarren edo zazpigarren aldia da Ramon Barea nirea dan zeozertan dagoala eta perfektu dago, betiko lez.