Loraldiak eta Lekeitiok gazte sormena sustatuko dabe

| Ikusi handiago | Argazki originala

Loraldiak gazteei zuzendutako kultur sormen-egonaldien deialdia aurkeztu dau, 30 urtetik beherakoei zuzendutako ekimena, hain zuzen be. Egonaldia bagilaren 23tik 27ra egingo da Lekeition eta euskerazko kultur-proiektuak sortzeko eta garatzeko espazioa eskainiko dau, tutoretza profesionalagaz.

Gazteen sormena sustatzea da programearen helburu nagusia. Sormen egonaldiak parte-hartzaileei euren proiektuak martxan jarteko baliabideak eta aholkularitzea eskainiko deutsee, diziplina askotan: dramaturgia, jantzea, musikea, ikus-entzunezkoak, bertsolaritzea... 

Zer eskaintzen dau Loraldiaren gazte sormen-egonaldiak?

• Sormen-egonaldia, egun bat eta bost egunen artekoa.
• Tutoretzapeko lana: sortzaile gazteek erreferente profesional baten laguntzinoa jasoko dabe euren proiektua garatzeko.
• Baliabideak eta ostatua: lanerako espazio egokia eta ostatuan erdi-pensinoa.
• Kultur ekintzak: Loraldiak aste horretan atondutako Lekeitioko Sormen Astearen ekintzetarako parte-hartzea doban izango da.

Parte hartzeko baldintzak

• 30 urte baino gitxiago izatea.
• Banaka edo taldeka aurkeztea.
• Euskeraz garatzeko kultur-proiektua izatea.
• Egun bat eta bost egun arteko egonaldia izan daiteke, eskaeren eta beharren arabera.
• Proiektuaren tutorea izateko nahi dan personea edo profesionala proponidutea.

Egutegia

• Urtarrilak 30 - zezeilak 20: proposamenak aurkezteko epea.
• Zezeilak 21-28: ebaluazinoa.
• Martiak 3: hautatutako proiektuaren jakinarazpena.
• Martiak 5: erabagiaren publikazinoa.

Izena emoteko epea urtarrilaren 30ean edegiko da. Gazte sortzaileek aukera parebakoa dabe euren ideak landu eta euskerazko kultur sorkuntzan urrats garrantzitsu bat emoteko. Informazino gehiago eta izen-emote orria hemen.

Atontzaileak eta helburuak

Gazteentzako sormen-egonaldia Loraldiak atontzen dau hainbat erakunderen laguntzinoari eker: Lekeitioko Udala, Naiz Irratia eta Laboral Kutxa. Ganera, Bizkaiko Foru Aldundiaren babesa be badauka.