Bertsozalez bete zan Lesaka Bertso Egunean

| Ikusi handiago | Argazki originala

Bertsozale Alkarteak, Bortzirietako Bertso Eskoleagaz alkarlanean atonduta, sekulako eguna atondu eban Lesakan. Ganera, ekitaldi guztietarako sarrerak agortu ziran.

Oinak bidean ibilbideagaz ekin eutsen egunari. Harriondoatik hasi ziran bertsozaleak, mendi buelta gidatua eginez. Herrira bueltaukeran hasi zan bertso poteoa. Aramaioko Bertso Eskolako, Epifora Bertso Eskolako eta Lilibertso Bertso Eskolako ondoko bertsolariek parte hartu eben: Ane Zuazubiskar, Danel Herrarte, Iraide Onaindia, Manex Agirre, Eli Pagola, Maider Arregi, Oihana Arana, Uxue Alkorta, Aitor Etxebarriazarraga, Asier Galarza, Ibai Amillategi eta Iker Uriarte. Bertso poteoan, Amaia Taberna eta Olaia Urdangarin trikitilariak ibili ziran.

Mokaduen bueltan pasau eben eguerdia bertsozaleek Arranoan eta bazkalostean lasai egon ziran arratsaldeko ekitaldiaren zain. Ganera, ordurako jente gehiago be gerturatu zan. 17:00ak pasatxoan hasi zan XXI mende, 25 (H)illbeltz bertso saioa Harriondoa kultur etxean, eguneko ekitaldi nagusia. Kantuan Alaia Martin Etxebeste, Amets Arzallus Antia, Julio Soto Ezkurdia, Maddi Ane Txoperena Iribarren, Maialen Lujanbio Zugasti eta Peru Abarrategi Sarrionandia ibili ziran. Nerea Ibarzabal Salegi kantetakoa zan baina azken orduan Lujanbiok hartu eban Salegiren lekua. Gai-jartzaile lanetan Alaitz Rekondo Ferrero ibili zan.

Arratsaldekoa amaituta, oraindino asko falta zan bertso egunean. Halanda ze, sagardaotegian afaldu eben bertsozaleek eta horren ostean, bertso jarriak izan ziran Ekhiñe Zapiain Arlegi, Josu Txoperena Iribarren eta Manex Pagola Apezetxea. Amaitzeko, DJ Infernu ibili zan Arranoan.