Martxan da Bermeoko Kontakizun Laburren Lehiaketea

| Ikusi handiago | Argazki originala

Erroxape Emakumeen Alkarteak Kontakizun Laburren Lehiaketea jarri dau martxan. Betiko lez, aurton be, emakumea izan beharko da kontakizunen gaia. Lehiaketean 18 urtetik gorako edozeinek parte hartu leike eta narrazinoak euskeraz eta gaztelaniaz aurkeztu daitekez.

Lanak aurkezteko azken eguna zezeilaren 14a izango da. Egun horretako 20:00ak baino lehen aurkeztu beharko dira Erroxapek Erretenen dauen lokalean, Udal Liburutegian, Gizarte eta Kultura Etxean edo Bermeoko 115 posta kutxan.

Lanak orrialde bakarrean idatzita egon beharko dira, hutsune bikotxean, 1.200 karaktere orriko eta gehienez sei folio izan beharko ditue eta gitxienez lau. Erispide horrek betetzen ez dituan lanak zuzenean kanporatuak izango dira. Interesdunek lan bakotxeko hiru kopia aurkeztu beharko ditue gutun-azal zarratu batean. Berton, kontakizunaz gan, beste gutun-azal bat sartu beharko dabe egilearen datuekaz (izen-deiturak, helbidea eta telefonoa).

Aurkeztutako lanak jatorrizkoak eta inon argitarau bakoak izan beharko dira eta ezin izango dira aurkeztu beste edozein lehiaketean saritutako lanak. Egile bakotxaren lan bakarra sarituko da.

Saritutako lanak Erroxape Emakume Alkartearen jabetzean gerauko dira. Saririk jaso ez dituen lanak aurtongo bagilaren 1etik aurrera batu ahal izango dira. Epaimahaiak edozein sari emon barik ixteko eskubidea izango dau eta oinarriak betetzen ez dituen lanak lehiaketatik kanpo gerauko dira.

Lan irabazleen izenak martiaren 8ko egitasmoen barruan jakinarazoko dira. Sariei jagokonez, lehenengo saria lortzen daben euskerazko eta gaztelaniazko narrazinoek 250 euro eta plakea jasoko ditue; finalistek, 150 euro eta plakea; eta akzesita lortzen dabenak, barriz, plakea jasoko dabe.

Erroxape Emakumeen Alkarteak eta Bermeoko Udalak herritarrak konbidaduten ditue lehiaketean parte hartzera.