Euskal zinema-aretoetara ikusle gitxiago joan da 2024an

| Ikusi handiago | Argazki originala

Euskal zinema-aretoetara hurreratu diran ikusleen kopuruak % 6 egin eban behera 2024an, 2023 urteagaz alderatuta, baina diru-batzeari eutsi egin jakon. Aldaketea nabaria da, zinemetako zifrek etenbako hazkundea izan baitzeben aurreko urte bietan. 2024a Ameriketako Estadu Batuetako gidoilarien eta aktoreen grebeak markautako urtea izan da eta, horren ondorioz, 2025era atzeratu dira aurreikusitako nazinoarteko estreinaldi gehienak.

Euskadiko aretoetan batzea % 1 baino ez da jatsi, 2023ko datuakaz alderatuta: 23.704.000 eurotik 23.366.000 eurora pasau da. Beraz, deigarriagoa izan da ikusle kopuruaren jatsierea: 3.640.000tik 3.421.000ra. Datu horreek Espainiako batez bestekoaren oso antzekoak dira.

Comscorek emondako datuetan oinarrituta, geldialdia dago, baina, egia esan, bigarren seihilekoa lehenengoa baino askoz hobea izan zan. Bagilaren 30ean, ikusle kopuruaren beherakadea % 13 ingurukoa izanik, susperraldi handia izan da urtearen bigarren erdian. Halanda ze, 2025eko hasieran be holan jarraitzea espero da.

Datu gehigarri bezela, 2024an ez da euskal filmen arrakasta handirik igarri leihatilan, 2023an Irati edo 20.000 erle-espezie filmekaz jazo zan bezela.

Euskadiko film arrakastatsuenak

Euskadin, 2024an, 10 film arrakastatsuenak ondoko honeek izan dira, hurranez hurran: Inside out 2, Deadpool y Lobezno, Gladiator II, Gru 4 mi villano favorito, Vaiana 2, La Infiltrada, Dune: Parte Dos, Kung Fu Panda 4, Robot salvaje eta Padre no hay más que uno 4.

Deigarria da Euskadin gehien ikusi dan espainiar filma, hain zuzen be, euskal produkzinoa izan dala, La infiltrada; estaduko gainerako tokietan, barriz, Padre no hay más que uno 4 izan da. Ganera, La infiltrada sailkapen orokorreko seigarren pelikula ikusiena da euskal zinema-aretoetan.

Nazinoarteko estreinaldien artean, euskal ikus-entzuleek Inside out 2 aukerau dabe: 1.863.597ko dirutzea batu dau eta 261.933 personek ikusi dabe. Datu horreek Deadpool y Lobezno bigarren sailkatuak lortutakoen bikotxa dira.