Katalina Goiaren ‘Libro de cocina’ sukaldaritza liburuaren laugarren edizinoa plazan

Bizkaie! 2024-12-13 08:08   Jan edanak

Eskualdeko eta inguruko herrietako emakume asko izan ziran harek emondako sukaldaritza eskoletan parte hartu ebenak eta baita Goiak mimoz egindako sukaldaritza liburua eskuratu ebenak be, etxeko egunerokoan kozinau beharreko otorduetarako gida modura. Liburua haren ondorengoek be ezagutu dabe eta batzuek oinordetzan jaso be bai, altxor preziatuaren pare.

1950ean argitaratu eban Goiak liburua lehen aldiz, Beasainen, eta 1966 eta 1979koak izan ziran hurrengo argitaraldi nagusiak. Orain, 2024an, laugarren edizinoa plazaratu dabe ondorengook, amamari egindako autortza eta omenaldi lez.

Liburua Segurako liburu azokan aurkeztuko dogu abenduaren 13an; arratsaldeko 18:30ean hasiko da liburu azokearen edegiera ekitaldia, herriko egutegiaren argazki lehiaketearen sari banaketea, Azpilla jantza taldearen saskiaren zozketea eta herriko abesbatzaren ikuskizunagaz. Ondoren, bilobok liburuaren aurkezpena egingo dogu eta, jarraian, liburuko errezetak jarraituz Aiert Izagirre sukaldariak egindako mokadutxoak probetako tartea izango da. Libro de cocina liburuaren laugarren argitalpena be eskuratu ahal izango da bertan, %15 eko deskontuagaz.

Langile nekatuezina eta ekintzailea

Erroteagaz lotura estua izan eban beti Katalina Goiak, izan be, Mutiloako Troi-errota baserrian sortu zan eta umea zala Segurako Urnausi errota-baserrira joan zan biziten familiagaz. Hantxe igaro eban bizialdi osoa, laugarren argitalpeneko liburuaren azalean agertzen dan Urnausin.

Oso gazterik Bilbora joan zan neskame, sasoi haretan Bizkaiko uriburuko familia aberatsenetakoa zan Sota sendiaren etxeara. Sukaldaritzan eban trebezia ikusita, akademia espezializadu batera bialdu eben. Bergarako eta Donostiako hoteletan eta Ormaiztegiko eta Zestoako bainuetxeetan be lan egin eban. Aurrerago, sukaldaritza eskolak emoten hasi zan Urnasin bertan, baina laster txiki geratu eta Goierriko hainbat herritatik deitu eutsen eskolak emotera joateko. Eskolak emoteaz gan, baserrietan izaten ziran ezkontzak eta bestelako ospakizunetarako otorduak atontzeko be joten eben harengana eta bera arduratzen zan.

Era berean, Goiaren jakinduria liburu batean jasoteko erabagia hartu eban, 1950ean argitaratu ebana lehen aldiz, Beasainen. Galizian eta Madrilen be inprimadu eben liburua. 1966an etorri zan bigarren edizinoa, eta hirugarrena, barriz, 1979an, hil zan urtean. Edizino bakotxeko 2.000 bat ale plazaratu zituen.

60ko hamarkadan, Beasaingo Indar enpreseak Katalina kontratau eban bertako jangelaz arduratzeko eta Ixabel eta Karmen alabek lagundu eutsen langintza horretan, harik eta jubilau zan arte. Langintza ugari bateratu zituen, beraz, aurrez aitatutakoez gan, errotea eta baserriko lanak egin eta sei seme-alaba hazi eta hezi baitzituan.

Sasoi bateko sukaldaritzearen esentzia

Libro de cocina liburuak 525 errezeta ditu, honako atal honeetan banatuta: Hasierakoak, Arrainak, Haragiak, Postreak eta Izozkiak. Errezetak argiak eta laburrak dira, sukaldaritzan oinarrizko ezagutzak dituenentzat eta, beraz, gehienetan ez dau kantidadeen eta denpora-unidadeen inguruko informazino zehatzik emoten.

Laugarren argitalpen honetan bere horretan itxi dogu Katalinak idatzitakoa. Garai haretako egiteko eta adierazteko moduen eredu da, eta diktadura garaikoa izanik, gaztelaniaz idatzita dago, bera euskalduna zen arren.

Errezeten lanari, berari buruzko biografia erantsi deutsagu, argazki ugarizz eta baita autortza eta eskertza atal bat be. Atal bi horreek euskeraz dagoz.

Liburua Goierriko hainbat tokitan salgai

Segurako liburu azokan % 15eko deskontuagaz erosi ahal izango da liburua astegoien honetan. Hortik aurrera, Segurako Ardixarra etxean salduko dabe liburua. Bestalde, ondoko kokagune honeetan be eskuratu daiteke liburua: Beasaingo Mirentxu liburu-dendan eta herri dendan, Ordiziako Larratxa liburu-dendan eta Lazkaoko Gerriko liburu-dendan. Liburua 20 euroan dago salgai. Leku horreetan aurrez aurre erosteko aukerarik ez dabenek, edota galdera edo eskariren bat egin nahi daben herritarrek honako helbide honetara idatzi leikie: katalinarenliburua@gmail.com.