Dana prest Bertsolari Gazteen BBK sariketako finalerako

| Ikusi handiago | Argazki originala

Astebete baino ez da falta 32. Bertsolari Gazteen BBK sariketako finalerako. Zemendiaren 4an hasi zan sariketea eta ordutik, hiru kanporaketa eta finalaurreko 2 jokatu dira. Sariketeak, kanporaketea egiturea izan dau eta ondokoak dira finalean kantetako txartela eskuratu daben taldeak eta bertsolariak:

- A multzoan, 18 urte artekoetan:

• Sagutxo Kaskarinak 2.0: Garazi Ibarretxe, Maddi Aurtenetxe eta Naroa Iturrioz.
• Puntuak eta komak: Amaiur Betanzos, Ekhi Zuluaga eta Iradi Barrenetxea.

- B multzoan, 24 urte artekoetan:

• Team Rocket: Ixone Asategi eta Janire Arrizabalaga.
• Okerbidea: Iruri Altzerreka eta Peru Irastortza.

Abenduaren 5eko saioa publiko danari zuzenduta dago eta Idoia Anzorandia atontzaileak, saioa entzutera joateko konbidapena egin dau: barrikuntzaz betetako sariketea da aurtengoa; irudia, ariketak, taldeen osoketea aldatu doguz eta parte-hartzaileek eskertu dabe. Seguru gagoz finala be orain arteko saioak besteko erakargarria izango dala.

Kontuak kontu, finalean, hainbat barrikuntza egongo dira eta sari ekonomikoez eta txapelaz gan, beste hainbat kontu be dagoz atonduta. Tartean, Unai Gaztelumendi bertsolaria eta marrazkilaria egongo da zuzenean parte- hartzaileen karikaturak egiten, Unai Iturriaga bertsolari, idazle eta sortzaileak egindako ilustrazinoa banatuko jako kantakera onenari eta publikoak be izango dau bere saria, izan be, taldeak animetako pankartarik onenak saria jasoko dau.