39 emonaldi Titirijai Jaialdian

| Ikusi handiago | Argazki originala

Badator Titirijai, Tolosako 42. Nazinoarteko Txotxongilo Jaialdia. Bederatzi egunez, 39 emonaldi eskainiko dira; 18 konpainiak parte hartuko dabe; eta, 20 lan ikusteko aukerea izango da, esaterako, eskuko txotxongiloak, harizkoak, berreskuratutako materialakaz egindakoak edo giza neurriko gorputz txotxongiloak.

Horreen artean, euskerazko antzezlan bi: Ximurrak eta Titeres Etcetera konpainia andaluziarrak eskainiko dauen Peio eta otsoa. Leire Amonarriz tolosarraren El lagarto baila konpainiak be Izadi ikuskizuna eskainiko dau abenduaren 1ean, Leidorren. 0 eta 3 urte bitarteko umeei zuzendutako saioa da, berbarik bakoa.

Topic Zentroko aretoetan, Leidor Antzokian eta kalean izango dira ikuskizunak. Gipuzkoako 8 herritan, barriz, beste 16 emonaldi eskainiko dira.

Sarrera guztiak hemen eta Topic-eko lehiatilan.

Programazinoa

Jaialdiari hasierea emoteko, zemendiaren 23an, Aviama 2024ko Nazinoarteko Saria jasoko dau Topicek, txotxongilo-antzerki esparrua barritzeko egindako lanagaitik. Segiduan, Murtziako Onirica mecanica konpainiaren Verne ikuskizunaren aurre-estreinaldia izango da. Konpainiak astebeteko egonaldi teknikoa egingo dau datorren astean Topicen. Datorren astegoienean, Zaches konpainia italiarrak ikastaroa eskainiko dau, Unima Euskal Herriagaz alkarlanean, irudi antzerkiaren barrikuntzeari buruz. Herritarrentzako tailerrak be izango dira: zemendiaren 24an (18:00) eta 29an (17:00).

Hilaren 26an, martitzenean, hiru liburu aurkeztuko ditue Topicen: Malen Amenabar eta Miren Amurizaren Titiritari eta Paco Paricioren beste bi, Los secretos del titiritero eta La extraordinaria vida de Polichinela.

Eguenean, zemendiaren 28an, Topic Tolosaren 15. urteurrena ospatuko da, 17:00etan.

Hilaren 29an, barikua, autortzea egingo deutso Topicek, 50 urte bete dituan L'Estaquirot Teatre konpainiari. Ganera, museoan konpainia horren inguruko erakusketea dago ikusgai, martiaren 9ra arte. Hilaren 29an, bisita gidatua egingo dabe konpainiako kideek, 17:00etan, doban.

Beste erakusketa bi ikusteko aukerea be izango da. Batetik, aurton hil dan Txetxo Gaztañaga diseinatzailearen kartel erakusketea ikusi ahal izango da Topiceko sarrerean. Hamarkada bi baino gehiagoko lotura estua izan eban jaialdiagaz, besteak beste, Txantxo personaiaren sortzailea izan zan. Bestetik, Tolosako saltokien erakusleihoak txotxongiloakaz apainduko dira.

Ikusi programazino osoa hemen.