Irati Bilbao: 'berbaera barriek inspiretan nabe'

Lau urteko itxaronaldi luzearen ondoren, Irati Bilbao durangarrak bakarkako Bloom aurkeztu deusku, bere aurreko lanak Begin (Gaztelupeko Hotsak) izenburukoak sortutako indarrari eutsiz. Mikel Nuñez pianistea, Fran Serrano kontrabajuan, Aitor Bravorena baterian, Alvaro Zarzuela tronboian eta haize konponketan, Xabier Arriola fliskornoan eta tronpetan eta Haizea Martiartu saxofoian. Musikari bikainak.

Oiartzungo Mecca Recording Studioan Mikel Ezeizaren eskutik grabau, nahastau eta masterizauta, Bloomek erakusten deuskuz Irati Bilbaoren ahots gaitasuna eta bere konposizinorako talentua.

Bloom jazz klasikoaren eremuetatik maisutasunez dabilen artista baten lana da, izan be, Iratiren beraren The Tree edo Bloom lako abestiak jazz garaikideko piezak dira baina I fall in Love too Easily lako klasikoak be ezin ahaztu. Bikain jorratzen dau Places, Bilbaok idatzitako beste abestietako bat; eta lan honi amaierea emoten deutso Mendian Gora kantuagaz, jatorriz Imanol Larzabal abeslari eta konpositoreak eta Xabier Amuriza idazle eta poeteak idatzitako konposizinoa.

Kontzertuetako errepertorioa batez be Bloom diskoko kantuetan oinarritzen da baina Begin (Errabal Jazz 2020) izeneko lehen diskoko zenbait kantu be sartzen dira. Abesti propio zein klasikoek osotzen dabe jazz ikuskizuna, konposaketa eta mimo handiz jagondako moldaketen bitartez kontzertu personal eta bakana eskainiz.

Kontzertuei jagokenez, egun batzuk barru, zemendiaren 21ean eskaniko dau Barakaldoko Barakaldo Antzokian, 20:00etan eta hurrengoa Iurretako Ibarretxe Kultur Etxean izango da zemendiaren 22an, 19:00retan.

Durangarragaz egotea beti da plazerra eta hona hemen gustora emon deuskuzan erantzunak:

1.- Zorionak Irati disko barria Bloom plazaratu eta bizitzan be pausu polita emon dozulako. Lan barria personalagoa, bilaera artistikoa erakusten dauena ei da Bloom. Zuk zeuk zer dinozu?

 

Holan da, bai. Lau urte igaro dira nire lehen lanetik eta urte honeetan guztietan maila musikalean eta pertsonalean bilakaera bat egon da, eta horren erakusle da Bloom lan barri hau. Konposaketa propio gehiago dagoz eta aurreko lanagaz konparauta salto bat egon dala esango neuke.

2.- Bakarka kaleratutako diskoa da baina Mikel Nuñez pianistea, Fran Serrano kontrabajuan, Aitor Bravorena baterian, Alvaro Zarzuela tronboian eta haize konponketan, Xabier Arriola fliskornoan eta tronpetan eta Haizea Martiartu saxofoian. Musikari bikainak danak. Zuzenekoetan be zeugaz izango dira?

 

Zuzeneko gehienetan azken urteetako laukote formatuan joango naz, hau da Mikel Nuñez pianistea, Fran Serrano kontrabaxujolea eta Aitor Bravo bateriagaz. Alde batetik abestiak formatu honetan joteko pentsau nituan hasieran, eta aurrerago musikari horreen ekarpenak gehitu nituan emoitzea oraindino biribilagoa lortzeko baina beti zuzenean lauron artean defendiduteko ideiari eutsiz. Beste alde batetik, lau persona mobidutea zazpigaz egitea baino askoz errezagoa be bada... Baina kontzertu berezietarako gustauko litxakit eurak be etorri ahal izatea. Posible baldin bada saiatuko naz gitxitan bada be noizbat zazpirak oholtza gainean egoten.

3.- Jazz abeslaritzat dozu zeure burua?

Bai, gehienbat bai, baina ez hori bakarrik. Ikasketen aldetik jazz musikan espezialista bezela formau naz eta nire proiektu personala bide horreetatik daroat baina beste estilo batzuetako proiektuetan be hartu izan dot parte, esate baterako Sarrabete taldeagaz folk musikan. 

 

Gatxa da aukeratzea… seme-alaben artean bezela aukeratzea da. Danak maite ditut eta arrazoi bat edo beste bategaitik dagoz hor. Baina, akaso, The Tree, Bloom eta Intimate dira nire faboritoak, ezin dot hiruren artean aukeratu. Hirurek islatzen dabe nire musikea eta estudioko emoitzeagaz oso pozik geratu naz.

5.- Errabalen eretxiz, jazz klasikoa eta musika originala darabizuz, sentimenduz eta teknikaz erdibana horniduta, arimea soinuagaz lotzen eta arte bihurtzen dauen hats zintzoa. Zein da zure eretxia?

Ni jazz klasikoaren hizkuntzan gustora sentiduten naz, betiko standarrak abestu eta berrinterpretetea gustetan jat abesti eder eta biribilak diralako eta izaten jarraitzen dabelako. Baina aldi berean nire erreferentziak ez dira klasikoak bakarrik, gaur egungo artista askoren lengoaia edo berbaera barriek inspiretan nabe eta nire konposaketak nahitaez bide horretara hurreratzen dira, naturala dala uste dot. Horregaitik aurrera begira idazten ditut berbak baina atzera begiratzeari itxi barik. 

6.- Besteak beste, Sarrabete, Irati Bilbao Quintet, Ekuru eta Reunion Big Band taldeetan ibilitakoa zaitugu eta bitxikeria legez, Jazzbana Ensemble konpainiagaz aldarrikapenerako tartea be hartu zenduan, besteak beste, emakume musikariei euren garrantzia autortu behar jakela esanaz. Bloom diskoan badago holako jarrerarik?  

 

Jarrera hori beti dago, nigan, gugan dago. Aurrerapausu handiak emon doguz azken urteetan emakumeen figurak aldarrikatuz baina panoraman gizonezkoen erreferenteak dira gehiengo eta ezin dogu atzera pausurik emon orain. Atzetik datozenen eredu izan behar gara, bideak zabaltzen jarraitu. 

Disko barrian esate baterako Haizea Martiartu saxofoijole markinarrak hartzen dau parte eta pozik nago emakume musikari euskaldun baten figura honen presentzia izateaz.

7.- Bloom aurkezteko lehenengo kontzertua Barakaldon eskainiko dozu zemendiaren 21ean eta hurrengo egunean 22an, Iurretan izango zara. Abenduaren 14an, Gijonen dozu hitzordua, Meidinerz Jazz Clubean eta 2025eko zezeilaren 15ean Bilboko Kafe Antzokikoa be berezia izango da zuretzako. Errepertorioa bardin antzekoa izango da hitzordu danatan?

 

Lehen hiru kontzertuetan bai, batez be disko barriko abestiak kantauko ditut baina aurreko diskoko batzuk ez dodaz ahaztuko. Baina zezeilekoa behar bada bereziagoa izango da, Bilboko aurkezpena izango da eta gustauko litxakitsorpresaren bat ekartea... 

8.-  Getxoko, Hondarribi eta Goierriko jazzaldiak, Gasteizko Jazz Vital, Agorrijazz, Lugoko Jazz Jaialdia, Cordobako Jazz Jaialdia, Club Clavicémbalo, Jazz Filloa, Malagako Clarence Jazz Club edo Terrassako, Nova Jazz Cava leku ezagunak dozuz. Bateren bat azpimarratzekotan, zein eta zergaitik?

Gatxa da aukeratzea, danak dira bereziak. Alde batetik, Filloa lako klub txikiak maite ditut publikoaren gertutasunak eroso sentiarazoten nauelako, baina aurten Getxo Jazzen jotea oso berezia izan da, urte askotan ikusle bezela joan naz eta orain ni kartelean egotea ames bat betetea izan da.

9.- Diskoa defenditutea izango dozu orain buruan baina bestelako erronkarik nabarmenduko zeunke?

 

Erroka garrantzitsuena ikasten, abesten eta sortzen jarraitzea da. Kontzertuak lortzea, proiektua aurrera ataratea. Gaur egun jazzaren panoraman egotea eta jarrera horri eustea be nahikoa erronka da...