Hitzetik Hortzera: Gorrititik Amerikako Estadu Batuetara, Martin Goikoetxeagaz

| Ikusi handiago | Argazki originala

Gorrititik Amerikako Estadu Batuetara artzain joan zan 18 urtegaz Martin Goikoetxea: 1966ko Nafarroako Bertsolari Txapelketan parte hartzen egoan Wyomingera joateko deia jaso ebanean eta ezin izan eban Iruñeko finalaurrekoan kantau. Gorritik Wyomingera joandakoan izandako aldaketei buruz eta artzain lanari buruz egingo dabe berba aste honetako Hitzetik Hortzeran.

Bertara joandakoan bere bertso ibilbidea amaitu zala pentsau eban Goikoetxeak, izan be, 20 urtean kantau barik egon arren, 1991an Nevadako Gardnevillen Kantari Egunean parte hartu eta horrek emon eutson indarra barriro be bertsotan hasteko. Ordutik, bertsotan jarraitu dau Amerikako Estadu Batuetako saio askotan; gaur egun, hango bertsolarietako bat da, bertsolari ugari trebatu eta bertso-eskolak Skype bidez egiten ditue.

Goikoetxearen lehen bertso plazei begira be jarriko dira programan: lehen plazea 12 urtegaz egin eban, Kaxiano Ibargurenegaz, Gorritin bertan. Umea zaneko pasadizoak eta gaztetako bertso plazak ekarriko ditue gogora Hitzetik Hortzeran.

Gorritiko eta Garesko bertsoaldiak

Goikoetxeari omenaldia egin nahi izan eutson Gorritiko herriak eta bertso afaria atondu eben eta Gorritiko Kontzeju Etxean egindako bertso afariko bertsoaldiak eskainiko ditue aste honetako programan. Aitor Mendiluzek, Maddalen Arzallusek, Martin Goikoetxeak eta Xebastian Lizasok kantrau eben. Gai-jartzaile lanak, barriz, Julio Sotok egin zituan.

Bestalde, Garesen egindako Bardoen finala be izango da Hitzetik Hortzeran. Hor gu! taldeak (Ekhiñe Zapiain, Estitxu Arozena, Kattin Madariaga eta Maddi Ane Txoperena) irabazi eban; kantuan Baztanzopak eta Mutilatuak taldeak be ibili ziran. Baztanzopak taldean Alazne Untxalok, Amaia Elizagoienek eta Irati Majuelok kantau Eben eta Mutilatuak taldekoak ondokoak izan ziran: Iban Garro, Julen Zelaieta eta Urko Gartzia. Gai-jartzaile lanetan Ane Fagoaga, Ane Telletxea eta Uxue Mesa ibili ziran.

Hitzetik Hortzera: zapatuan, hilak 9, gaueko 21:00etan, ETB1en.