'Elgarrekin' goiburuari eutsiz egingo da Herri Urrats 2025eko maiatzaren 11n

Bizkaie! 2024-11-06 07:45   Euskerea berbagai

Aurtengo goiburua Elgarrekin da eta logotipoaren protagonista nagusia Erle Baltza. Elementu biak biztartuta, indar handia hartzen dabe bai goiburuak zein irudiak.

Elgarrekin, danok batera egiten dogulako Herri urrats eta holan ez balitx ezinezkoa litzatekelako Iparraldeko auzolan handiena aurrera eroatea. Elgarrekin, iparra eta hegoa herri bat irudikatuz. Elgarrekin, Seaska eta jendartea ikastolak eregiten eta horreei eusten. Elgarrekin, euskara hauspotuz. Egungo jendarte indibidualisteari aurre eginez, elgarrekin egitearen eta elgarrekin egotearen aldeko apustua egiten dogulako.

20.000 erle espezie ei dagoz munduan eta horreen artean geure-geurea dogu Erle Baltza. Erleek alkarregaz egiten dabe lan eta komunidadean bizi dira; hori dala-eta, oso ondo irudikatzen dau goiburuagaz nahi doguna. Erleak berebiziko garrantzia dau ekosisteman; esaten da erleak desagertuko balira, munduak lau urte gehiago baino ez leukela iraungo. Gure komunidadeagaz bardin jazoten da: Seaskako komunidadea behar beharrezkoa da euskereak bizirik iraun daian Iparraldean, bai eta euskalduntzeagaz jarraitzeko be.

2025 urteko Herri Urratsean jasotako dirua oraintsu sua hartu eban Arberoako Ikastolea laguntzeko eta Senpereko kolegioaren bigarren partea finantzietako erabiliko da.

Egitaraua

Egun osoko egitarau oparoa iragarri dabe gunez gune Herri Urrats egunean topauko doguna:

Nafarroa Berria Gunea: Basapiztiak, Mister Xaguak, Zetkin, Delirium Tremens, Muga Zero (Maketa Lehiaketako irabazlea), Esne Beltza eta Leihotikan.

Araba Berria Gunea: Haizea Arrosa, Mutxikoak, Niko Etxart, Bele, Neomak, Nogen eta Holako Deluxe.

Gipuzkoa Gunea: Bertsolariak (Amets Arzallus, Irantzu Idoate, Haira Aizpurua eta Unai Agirre. Xalbat Alzugarayren gidaritzapean), Baiona Kantuz, Etxepe, Pisso OPH, Eire eta DJ Bull eta Elepunto.

Xiberua Gunea (JANTZA Gunea): Estitxu Robles eta Dantzaz, Neskena, Brilili Banda, Ortzadar eta Erregetxopitak eta Los Chancaires.

Lapurdi gunea: Zapiain Sagardotegia, Zikiroa, Kuxkutu. MANTANGORRI eszenan umeentzat: Gurashow, Pontx eta Eidaberen Gora Bihotzak.

Baxe Nafarroa Gunea: Erronka Nazionala.

Bizkaia Gunea (Gune barria): Umeentzako puzgarriak.

KEI gunea (gune barria Kattalin Elizalde kolegioan): peilota partiduak goiz osoan.

Horrezaz gan aintziran zehar: joaldunak, Elektropottotte, Elektrotxorongo, Gaitistan...

Dupla taldeak egingo dau 2025eko Herri Urratserako kantua 

Duplaren iparraldeko lehen kontzertua Herri Urratsen izan zan eta ordutik ia-ia iparralde osoko jai eta jaialdietan egon izan dira. Abestia egiteko proposamena mahai gainean jarri geuntsenean ez eben ezelako dudarik izan. Dabnorduko hasi dira abestia eta bideoklipa preparetan eta lan saioa be egin dabe lizeoko ikasleakaz, Seaskaren sortzaileakaz eta Herri Urratseko atontzaileakaz eta bertan jasotako bizipen eta ideak ardatz hartuta sorkuntza lanari ekin deutse. Ezustekorik ezean, abestia eta bideoklipa martiaren hasieran aurkeztuko ditue.