Badatoz 2024ko Bardoetako final-laurenak

'Baztanzopak' eta 'Hor gu!' taldeko kideak. | Ikusi handiago | Argazki originala

Asteburuan jokatu ziran lehen faseko azken sei saioak; Iruñean, Erronkarin, Eugin, Atarrabian, Leitzan eta Erratzun hain zuzen be. Beraz, ondoko sei taldeek eskuratu dabe tokia final-laurenetan: Manteleko sobrak (Leitza-Altsasu-Barañain), Baztanzopak (Baztan), Argako Bixiguak (Atarrabia-Barañain), Mutilatuak (Bortziriak-Baztan), Hor gu! (Bortziriak) eta EzKrashak (Iruñerria). Urriaren 4an hasiko da fasea.

Iruñeko Laban jokatu zan asteko lehen saioa, etxeko EzKrashak eta Bortziriak eta Baztango Mutilatuak taldeen artean. Bisitariek irabazu¡i eben. Antzera jazo zan Leitzako Gaztetxeko saioan be, bertako Manteleko sobrak eta Iruñeko Drimtim taldeen arteko saioan. Leitzarrek saioa irabazi eta bigarren puntua lortu eben, sailkapena bermatuz. Baztanzopak taldekoek asteburuko saio bietan lortu eben puntua. Lehenengoa barikuan, Erronkariko Errota Alkartean Erronkari-Iruñerriko Errimaren Matxinatuak taldearen aurka egindako saioan. Bigarrena, zapatuan Erratzuko alkartean Bortzirietako Hor gu! taldeagaz kontra jokautakoan. Dana dala, azken horreek ez ziran esku hutsik geratu, salkapena be lortu dabe eta; A, B, C eta D multzoetako bigarren sailkatu onenak bezela.

Eugin eta Atarrabian izan ziran asteburuko beste saio biak. Eugiko ostatuan izandako saioan, Erroibarreko Pirini Bardo eta Sakanako Joiak ibili ziran lehian. Atarrabiako Azkena Alkartean izan zan saioan etxeko Argako Bixiguak eta Malerrekako Malerreka ez da Baztan izan ziran kantuan. Lehenengoek irabazi eben saioa, halanda ze, faseko sailkapenean bardinketea egon da talde bi horreen artean. Desenpaterako erispideak behin ezarrita, Argako Bixiguek lortu dabe hurrengo faserako txartela.

Sei saio

Hiru kanporaketa izango dira final-laurenetan, joan-itzuliko formatuan. Guztira, beraz, sei saio izango dira, ondorengo herrietan: Irurtzunen (urriak 4), Tafallan (urriak 4), Iruñean (urriak 4), Etxaurin (urriak 12), Irunberrin (urriak 12) eta Tuteran (urriak 12). Final-laurenak ez dira jokatuko parte hartzen daben taldeen herrietan, beste sei herrietan baino. Modu horretan, Bardoak egitasmoa eta bertsolaritza ahalik eta Nafarroako bazter gehienetara eroan nahi dau Nafarroako Bertsozale Alkarteak.