Entzute handiko 18 talde Antzerkiren eta Kaleko Arteen programazinoan Aste Nagusian

Itziar Urtasun, Tor eta Txoborro. | Ikusi handiago | Argazki originala

Kaleko Antzerkia eta Arteek agertoki handi bihurtuko dabe aurton be Bilbo, Bizkidetasun Plaza, Isozaki Dorreen artean (kokapen barri bezela, Gas Plazearen ordez). Toki barriak, Casilda Iturrizar Parkeko Pergolako agertokiagaz batera, 23 ikuskizun eskainiko ditu, 18 konpainiaren eskutik; horreetako 6 Euskadikoak, 4 estadukoak eta 8 nazinoartekoak.

Beti be, Aste Nagusia hobetzea da asmoa eta aurton tokia aldatzea erabagi dogu, Bizkidetasunaren Plaza horreek eskaintzen deuskun harmaila naturalaz disfrutau ahal izateko, nabarmendu dau Itziar Urtasunek, Jaietako zinegotziak.

Urtasunek programazinoaren zehetasunak aurkeztu ditu Tor eta Txoborro (Akelar) magoakaz batera; biak, garagarrilaren 24an, Casilda Iturrizar Parkean, 19:30ean, Saloon ikuskizunagaz protagonista izango dira.

Aste Nagusian protagonista izango diran musikearen, magiaren, akrobazien, clown ikuskizunen eta umore handiaren adibide izan da berea, estreinaldien muntaia berezien eta sari ospetsuak lortu dituen lanen eskaintzakaz, Urtasunek nabarmendu dauenez. Horreen artean, Maleta Company & Compagnie Balancetoi konpainia belgikarra nabarmentzen da, Umore Azoka 2024 saria eta Valladolideko 2024ko TAC jaialdiko interpretazino onenaren saria irabazi baidabe. Ganera, Euskadiko konpainien presentzia be garrantzitsua izango da: Jaietan guztiok disfrutetako aukerea egotea nahi dogu, baita tokiko kulturearen alde jarraitzeko be, adierazo dau Jaietako zinegotziak.

Alde batetik, Bizkidetasun Plazan, ikusleek saio bikotxa izango dabe egunero, 12:30ean eta 21:15ean, azken domekan izan ezik, goizeko emonaldia baino ez baita egingo (12:30ean).

Beste aldetik, Casilda Iturrizar Parkeko Pergolako agertokian, Txikigunean, emanaldi bat egingo da egunero, 19:30ean, eta umeei eta familiei zuzenduta egongo da.

Euskal antzerkiaren alde

Abuztuaren 18an, domekan, hasiko da Antzerki eta Kaleko Arteen programazinoa, euskal konpainia eta antzerki talde euskaldun garrantzitsuekaz.

Holan, Casilda Iturrizar Parkeko Txikiguneak edegiko dau zikloa, Zirika Zirkus konpainia nafarraren Augustu Rubustu pirata zirku ikuskizunagaz, abuztuaren 18an, domekan, 19:30ean. Euskerazko lan horretan, altxorra bilatuz, piratentzat eta gizartearentzat egoera txukunagoa sortu nahi da, bardintasunean eta aniztasunean oinarrituz, aurreretxik gabe; antzerkia, zirkua eta umorea ez dira oharkabean pasauko.

Euskal ordezkaritzea dauen antzerki eskaintzea hurrengo egunean jarraituko dau, abuztuaren 19an, astelehenean, 21:15ean, Bizkidetasun Plazan, Zirkozaurre eta bere Harreman lanagaz; zirkua eta euskal musika tradizionala buztartzen ditu.

Abuztuaren 20an, martitzenean, 12:30ean, Bizkidetasun Plazan, Berdinki konpainiak Mikra zirku garaikidea aurkeztuko dau, diziplina akrobatikoak hizkuntza gisa erabilten dituan eta genero eta rol estereotipoak lako gaiak jorratzen dituan euskarazko piezea. Egun berean, baina Txikiguneko Pergolako agertokian, 19:30ean, Tiritirantes konpainiak zirku, magia eta umore istorioa eskainiko dau Bazen behin… lanagaz.

Bertako konpainiek presentzia izaten jarraituko dabe, Txikigunean asteko gainerako egunetan. Holan, abuztuaren 21ean, eguaztenean, Hortzmuga Teatro euskal antzerki konpainiak Agurea, urpekaria eta Itsasoa lana euskeraz interpretauko dau, familiak ikaskuntza eta tolerantzia abenturan sartuz. Abuztuaren 24an, zapatuan, Akelarrek Saloon magia lanagaz, publikoa harrituko dau.

Estaduko eta Nazinoarteko 12 konpainia

Tokiko kulturearen aldeko apustuagaz batera, Antzerkiak eta Kaleko Arteek estaduko eta nazinoarteko izen handiko konpainien eskaintza zabala be dago. Halanda ze, Katalunia, Frantzia, Italia, Belgika eta Marokoko konpainiak etorri dira.

Bizkidetasunaren Plazaren kasuan, lehen nazinoarteko emonaldia abuztuaren 18an, domekan, izango da, 12:30ean, Compagnie Émergente eta Déséquilibre passager ikuskizuna malabarrekaz. Gauean, 21:15ean, leku berean, Leo Bassi italiarrak The Best of the Bassi antzezlana aurkeztuko dau.

Astelehenean, hilak 19, 12:30ean, Catalunyako Circ Vermut konpainiak Ni cap ni peus zirku eta pailazo ikuskizuna eskainiko deutse familiei.

Estaduko antzerkiagaz jarraituz, Madriletik, martitzenean, hilak 20, 21:15ean, Trocos Lucosek publikoa jolastera konbidauko dau Tartanas obreagaz.

Abuztuaren 21ean, eguaztenean, 12:30ean, Maleta Company & Compagnie Balancetoiren txandea izango da, Umore Azoka 2024 sariaren eta Valladolideko 2024ko TAC jaialdiko interpretazino onenaren sariaren irabazleak. Belgikako zirku garaikideko konpainiak, egoitza Irlandan dauenak, malabareak, manipulazinoa eta gorputza ditu protagonista. Aurton, Aste Nagusian Claudette txotxongilo eta malabareen lana antzeztuko dabe. Egun horretan bertan, hurrengo txandean (21:15ean), Valentziatik La Finestra etorriko da, Tranvía nº12 lana aurkeztuz, zirkuaren eta musikearen arteko loturea sortuz.

Frantziako zirkua protagonismoa hartuko dau abuztuaren 22an, eguenean, Cirque Filyfolia eta Retour à la terre clown zirkuaren eskutik, 12:30ean, eta ondoren, Cirque Entre Nous taldearekin eskutik Bordeline lanagaz, 21:15ean.

Marokotik Colokolo Circus-ek Quahwa Noss lana helduko da Bilbora. Proiektuak zirku narratiboko istorioa aurkeztuko dau, egoera komiko, poetiko eta akrobatikoekaz konbinaduta. Lehenengo emonaldia abuztuaren 22an, 12:30ean, izango da, eta bigarrena 21:15ean.

Okidok konpainia belgikarraren zirkua eta zuzeneko musikea abuztuaren 24an, zapatuan, izango da, 12:30ean, pailazo bikoteakaz, In petto antzezlana interpretaduz. Ondoren, 21:15ean, UPArte konpainiaren Murtziako zirku garaikideak, DESproVISTO aurkeztuko dau.

Bizkidetasun Plazako zikloari amaierea emoteko, hilaren 25ean, domekan, Acousteel Gang konpainia frantziarra izango da L´Acousteel se fait la belle ikuskizun musikalagaz.

Casilda Iturrizar Parkeko Txikigunea estaduko eta nazinoarteko obren eta konpainian topagunea be izango da. Astelehenan, hilak 19, Compagnie Émergente, zirku konpainia frantziarrak, Déséquilibre passager ikuskizuna eskainiko dau. Abuztuaren 22an, eguenean, Maleta Company & Compagnie Balancetoi izango da. Abuztuaren 23an, barikuan, Cirque Filyfoliak Retour à la terre izeneko clown zirkua eskainiko dau.

Belgikako Okidok konpainiak amaitutzat emongo dau aurtengo edizinoa, In petto pailazio bikotearen interpretazinoakaz, domekan, hilaren 25ean.