Nazinoarteko bederatzi banda izango dira 'Haizetara' Lehiaketan

| Ikusi handiago | Argazki originala

Urtero lez, Amorebieta-Etxanok Haizetara Fanfarre, Banda eta Kale Musikearen Nazinoarteko Lehiaketea atondu dau; jatorri askotako bederatzi taldek herriko kaleak hartuko ditue bagilaren 21, 22 eta 23an, ekimenaren XVII. edizinoan.

Aurton, 12 nazionalidadetako 51 taldek aurkeztu dabe hautagaitzea: Frantzia, Italia, Canada, Portugal, Australia, Txile, Mexiko, Belgika, Argentina, Erresuma Batua, Benim eta Espainiak. Guztira, hiru sari banatuko dira: epaimahaikideek bi emongo ditue, eta herritarrek, bat.

Estaduari jagokonez, 13 probintziatako hautagaitzak jaso ditue: Tenerife, Barcelona, Madrid, Jaén, Gipuzkoa, Valencia, Segovia, Valladolid, Palencia, Navarra, Albacete, Zaragoza eta Bizkaia.

Nazinoarteko bederatzi banda

Lehiaketean parte hartuko daben bederatzi bandak bagilaren 21ean aurkeztuko dira, 19:00retan, Zelaieta Parkean, eta guztiek hainbat ikuskizun eskainiko ditue Amorebieta-Etxanoko kaleetan. Hiru eguneko lehiaketan, talde bakotxak 4 kontzertu eskainiko ditu herriko hainbat tokitan, eta bagilaren 23an sari-banaketeak emongo deutso amaierea 13:00ean lehiaketeari.

Ondoko honeek dira Amorebieta-Etxanon izango doguzan bandak: Tenampa Brass Band (Mexiko); Orchestre National Du Jahniner (Frantzia); Brazzmatazz (Belgika); UGS Brass Band (Frantzia); Llareggub Brass Band (Erresuma Batua); Pixie & Dixie Band (Espainia); Trocamba Matanusca (Espainia); Tamarros (Italia); eta New Tocados (Espainia).

Hiru sari

Kaleko Fanfarreen, Banden eta Musikearen Nazinoarteko Lehiaketan parte hartzen daben taldeek lehiaketako hiru sarietako bat irabaztea izango dabe helburu. Amorebieta-Etxanoko Udalak izentautako epaimahaiak aukeratuko ditu sarietako bi: 15.000 euroko Banda Onenaren saria eta 1.000 euroko Instrumentista Onenaren saria. Hirugarren sari bat be izango da: zornotzarrek eta Amorebieta-Etxanora hurreratuko diranak euren banda irabazlearen alde botau ahal izango dabe www.haizetara.eus webgunearen bitartez, eta Publikoaren Sariaren talde irabazleak 4.000 euroko saria jasoko dau.