22 urteko Aroa Arrizubietak irabazi dau txapela

Bizkaie! 2024-03-18 07:45   Bertsolaritzea

Aroa Arrizubieta da aurtengo txapelduna, Manexegaz buruz burukoa kantau ondoren. Aroari Xabi Ricok jantzi deutso txapela, 700 lagunen aurrean Gasteizko Printzipal Antzokian.
Zapatu arratsaldean, oholtzan, arabar bertsogintzea irudikatzen dauen bidea:

• Aroa Arrizubieta Barredo (Gasteiz).
• Peru Abarrategi Sarrionaindia (Aramaio).
• Manex Agirre Arriolabengoa (Aramaio).
• Paula Amilburu Izargarai (Aramaio).
• Iñaki Viñaspre Simon (Abetxuko).
• Asier Otamendi Alkorta (Urretxu/Gasteiz).

Nierves Del Alamo aurkezle eta Oier Suarez gai-emoileren eskutik sei bertsolariek ariketa puntuagarriak amaituta, Aroa Arrizubieta eta Manex Agirre pasau ziran buruz-burukora. Azken ariketak bien artean jokatu ondoren, Arrizubieta nagusitu da eta, beraz, 2024ko Arabako txapelduna da.

Finaleko epaimahaian egon ziran Fernando Sopelana, Aitor Jimenez, Ekaitz Elorriaga, Iker Elexpuru eta Patzi Aizpurua. Idazkari lanetan Endika Jimenez ibili zan. Kontuak kontu, holan puntuau zituen 6 bertsolariak:

• Aroa Arrizubieta: 614,5 puntu.
• Manex Agirre: 613,5 puntu.
• Paula Amilburu: 415 puntu.
• Peru Abarrategi: 412,5 puntu.
• Asier Otamendi: 410,5 puntu.
• Iñaki Viñaspre: 381,5 puntu.

Xabi Rico Iturriotzek jantzi deutso txapela txapeldunari. 1982an, beste batzuekaz batera Gasteizko Bertso Eskolea sortu eban, bertso eskolako irakasle, bertsolari, eta beste hainbat lanetan be ibili izan da. Arabako Bertsozale Alkarteak orain 40 urte txapelketako plazeari hasierea emon eutson Xabiri autortzea egin gura izan deutse eta eskerrak emon egindako ibilbide eta lanagaitik.

Eskerrak txapelketan parte hartu daben bertsolari, gai-jartzaile eta epaileei, baita txapelketa osoan zehar laguntzaile izan ditugun bertsozaleei, bertso-eskolei, txapelketa hartu daben udalei, babesle, laguntzaile zein hedabideei.

Aroa Arrizubieta txapeldunaren amaierako agurra:

Promesa haundiz ahoak betez
ari dira bonbak lehertzen
eskubideak murrizten eta
jendea etxegabetzen
nola nahi dute honen aurrean
geldi geratu gaitezen
nahiz ta betatzen ari zaizkigun
berdin Bilbon zein Gasteizen
sinisten dugun honetan irmo
dihardugu GKSn
politiko ta enpresen
aurrean altxatuz ezen
egungo gazte belaunaldien
zeregina ez ote zen
borrokatzea bihar gaur baino
hobeto bizi gaitezen.