Miribillako suhiltzaileen parkeak ate edegien eguna eskainiko dau
2024-02-27 12:31 KultureaMartiaren 2an izango da.
![](https://media.bzkcdn.com/argazkiak/rH/cache/suhiateedegi2_content.jpg)
Urtero lez, Bilboko suhiltzaileek San Joan Jainkoarena zaindariaren omenezko ekitaldiak egingo ditue martiaren 8an. Testuinguru horretan, martiak 2an, Miribillako parkeko ate edegien eguna egingo dabe. Parkeko instalazinoak 10:00etatik 13:30era edegita egongo dira.
Jardunaldia Bilboko Suhiltzaileen Kultur eta Kirol Alkarteak bultzatzen dau eta herritarrentzat da, baina, batez be, suhiltzaileen parkeetan egunero egiten dan lana eta profesional horreek larrialdi-egoerei aurre egiteko erabiltzen dituen materialak eta ibilgailuak gertutik ezagutu nahi dabenentzat.
Umeentzako hainbat jarduera eta olgeta egingo dira, besteak beste, ke-galeria, manga bat erabilten ikasteko, kamioi batean sartu eta tirolina eta autoeskalearen erakustaldietan parte hartzeko.
Beste ekitaldi batzuk
Suhiltzaileen zaindariaren jaiak domekan, martiak 3, jarraituko dau. Kirol-eguna izango da, eta jaiagaz egin nahi daben estaduko beste suhiltzaile-zerbitzu batzuekaz ospatuko da.
Egun horretan, goizeko 11:00etatik aurrera, Bilboko Suhiltzaileen XXI. Sariketea egingo da: 6 kilometro inguruko lasterketea Bilboko itsasadarraren ertzetan.
Ekitaldiak, martiaren 8an bertan amaituko dira, San Joan Jainkoaren egunagaz; goizeko 11:00etan suhiltzaileen ibilgailu klasikoen eta gaur egungoen karrusela egingo dabe. Miribillan hasi eta Bilboko kaleetan barrena ibiliko dira.
Jarraian, omenaldia egingo deutse Miribillako parkean erretiroa hartu daben suhiltzaileei. Eguerdiko 14:00etan, barriz, lankide arteko bazkaria egingo dabe eta, ondoren Suhiltzaileen Mus Txapelketea, ekitaldiei amaierea emonez.
Erantzun
Erantzuteko, izena emanda egon behar duzu. Sartu komunitatera!