Errotik, Gorbeialdek sustatutako proiektua

| Ikusi handiago | Argazki originala

Turismoko establezimenduek, lehen sektoreko produktore eta landa eremuan kokatutako enpresak jasoko dabe euskerea sustatzeko dobako zerbitzua eta irailetik dabiz lan horretan. 11 establezimendu eta produktore dabiz zerbitzua jasoten.

Arratiako eusGara zerbitzuak 2022an abiatu eban pilotaje baten emoitzea da Errotik proiektua. Orduko haretan hotel bitan egin zan lanketea eta emoitza positiboa ikusita zerbitzu barria sortzeko erabagia hartu dau Gorbeialde elkarteak.

Gorbeialde landa garapeneko alkarteak euskerea sustatzeko proiektua jarri dau martxan: Errotik. Arratiako eta Hego Nerbioiko landa eremuan eta turismoan euskerearen erabilerea sustatzeko helburua dau eta dobako zerbitzua emongo deuitse lehen sektoreko produktoreei zein turismoko establezimenduei.

Bizkaiko Foru Aldundiak finantziau dauen proiektua irailean jarri zan martxan eta daborduko 11 produktore eta establezimenduri emoten deutse zerbitzua. Landa eremuko hainbat enpresetan hutsunea dagoala ikusi eban Gorbeialde alkarteak, izan be, Arratia Nerbioi eremu euskalduna da, bainaturismoaren eremuko establezimendu askotan zein lehen sektoreko produktore askok ez dabe sarri askotan euskerearen presentzia bermatzen. Horregaitik, kasu askotan eskualdeko errealidade linguistikoaren islarik ez da ikusten turismoan zein landa eremuan dagozan enpresetan eta horregaitik erabagi dau Gorbeialdek hizkuntza kudeaketearen eremuan eragiten hastea.

Proiektuaren jatorria lehenagotik dator, izan be, 2022. urtean pilotaje bati ekin eutson Arratiako arlo sozioekonomikoan euskerea sustatzen dauen eusGara zerbitzuak Gorbeialde alkarteagaz alkarlanari eta hotel bigaz lan egiten hasi ziran: Zuhaitz Etxeak eta Etxegana spa & hotel. Hainbat lan egin ziran orduko haretan, hau da, bezeroei emoten jakezan eskuorriak itzuli, menuak euskeratu, hizkuntza-paisaian eragin, sare sozialetan euskerearen presentzia bermatu...

Lanketearen balorazino positiboa egin eben alde guztiek eta proiektu propioa sortzeko aukerea egoala ikusi eban Gorbeialdek.

eusGararen eragin eremua industria arloko enpresak dira eta landa garapenean eragiteko aukera mugatua dauka. Gorbeialdek Bizkaiko Foru Aldundiarengana jo dau proiektuaren finantziazinoa topetako eta Ahize-AEK hizkuntza aholkularitzarengana zerbitzu teknikoa jasoteko. Bertako aholkulariak emongo deutse laguntzea landa garapeneko eta turismoko establezimenduei. Honako zerbitzu honeek eskainiko deutsee: Itzulpenak, hizkuntza aholkularitzea, trebakuntza saioak, hizkuntza ohituretan eragiteko laguntzea, dirulaguntzen kudeaketea...

Ondokoak dira, oraingoz, Errotik proiektuagaz bat egin daben establezimendu zein produktoreak: Hikei, Areatza hotela, Ubideko Herriko taberna, Etxegorri ostatua, Artiñano etxea, Zeberioko Taberna zaharra, Ermitabarri apartamentuak, Zuhaitz Etxeak, Etxegana hotel & spa, Urduña museoa eta Askibil gaztandegia.

Errotik, Gorbeialde landa garapeneko alkarteak sustatutako proiektua jentaurrean aurkezteko ekitaldian egon dira Isaak Amezaga Bizkaiko Foru Aldundiko Euskera zuzendaria, Olatz Urkiza Gorbeialde alkarteko presidentea, Bingen Larizgoitia Gorbeialdeko kudeatzailea, Arkaitz Estiballes Zeanuriko zinegotzia, turismo-teknikaria, hizkuntza aholkulariak eta proiektuan parte hartzen dagozan establezimenduetako ordezkariak.