'40'. JOSEBA GOTZON

Joseba Gotzon 1984an hasi zan bere ibilbide diskografikoa Gau Hotza lehen singlea Akelarre taldeagaz grabatuz. Ordutik, 20 lan argitaratu ditu bakarlari bezala eta 3 alkarlanean, euskal artistarik oparoenetako bat izanik.

40 urte hauetaz zehar hainbat artista, musikari eta abesbatzarekin kolaboratu dau, besteak beste, Niko Etxart, Gontzal Mendibil, Josep Teró, Xoán Curiel, Tontxu, Argentina, Aurora Beltrán, Javier Bergia, María Blanco, Angel Petisme, Lur Maitea otxotea edo Chema Puente ravelista kantabriarra; Argentinako Eli Gigena, Angel Oscar Gilés edota Mariano Manzanelli musikariak;  Noel Abella Aiscar zellista uruguaitarra.

Lau hamarkada horrek ospatzeko 40 sinfonikoa izeneko bira artistikoa prestatzen ari da. Bira horretako errepertorioan dagoeneko grabautako abesti batzuk eroango ditu, besteak beste, Loreak bidali nizkizun (Botere Zalantzakoak, 1987), Bihotza ezin da erosi (Nortasuna, 1999) Maitasun sonetoa (Fotopoemak, 2003), Aquest ulls eta No m'interessa (Lau hormen artean, 2012) edo Urrundik (2021).