Euskerazko ahozko jarduna ikertzeko zortzi egitasmo saritu ditu Euskaltzaindiak

Bizkaie! 2023-05-11 07:55   Euskerea berbagai

Euskaltzaindiak, Mintzola proiektuaren bidez, euskeraz egiten dan ahozko jardunari buruzko deialdi bi argitaratu zituan martian: Bat, gradu eta master-amaierako zazpi lan saritzeko eta, bestea, hiru ikerketa-lan monografiko diruz laguntzeko. Danetara, hamabi eskaera aurkeztu dira eta epaimahaiak ondoko zortzi egitasmoak saritzea erabagi dau:

1. Beasaingo gazteen kafe-tertulia. Egilea: Maddi Aiestaran.

2. Adierazkortasuna lantzeko proposamen didaktikoa: Imitazino-jolasak. Egilea: Iñigo Otaegi.

3. Hizkuntza nahasmenduaren aztarna bila euskeraz: Kasu-markea eta aditz komunztadurea. Egilea: Ainhoa Leyaristi.

4. Iruñerriko gazteen hizkerea. Egilea: Audrey Serrano.

5. Ergatiboaren erabilerea euskera-gaztelania kode-alternantzian: Kasu azterketea. Egilea: Endika Uriarte.

6. Lexikoaren aldakortasuna Imozko hizkeran. Inkesta linguistikoak. Egilea: Alazne Fernández de Muniain.

7. Aldudeko ibarreko euskerea. Egilea: Oier Urreizti.

8. Kode-alternantziaren erabilerea eta jarrerea euskaldunakan. Egilea: Mikel Pérez.

Gradu eta master-amaierako lanak onduko dituan Ikertzaile bakotxak 1.500 euro jasoko ditu eta irailaren 29ra arteko epea dabe proiektuak jorratzeko.

Ikerketa-lan monografikoaren saridunak 3.000 euroko laguntzea jasoko dau eta 2024ko zezeilaren 29ra arteko epealdia izango dau ikerketa-lana entregetako.

Helburua

Ikertzaile gaztea edo hasibarria doktoretza-tesiraino eroango dauen ibilbidean, aurreko erabagiak eta urratsak be garrantzitsuak dira eta hori autortzea eta unibersidadeko edozein jakintza-alorri ekinez, euskeraz egiten dan ahozko jarduna ikergaitzat hartzea saritzea da deialdi honen helburua.