Ikusi eta Ikasi programeak 0-10 urteko umeentzako jarduerak dakarz

| Ikusi handiago | Argazki originala

Dagoeneko 19. edizinoa bete dau Ikusi eta Ikasik, Bilboko umeei eta hareen familiei aisialdiko dobako jarduerak euskeraz eskaintzen deutsazan programeak. Udalak azaldu dauenez, aurtengo nobedade handiena parte-hartzaileen edadean egongo da: lehenengoz, 0-3 urte bitarteko umeentzako programea be egongo da, hortaz, tartea 0-10 urtera zabalduko dabe.

Urtarrilaren 16an hasi eta maiatzaren 26ra bitartean, uriko 15 udaltegi eta aretotan egingo ditue jarduerak, danetara 53 proposamen. Udalaren eta Euskaltzaleen Topagunearen asmoa garbia da: familientzako aisialdi-espazio euskaldunak sortzea eta hizkuntzearen erabilerearen normalizazinoan laguntzea.

Naturea eta kulturea ezagutuko ditue Bilboko umeek, eta euren edaderako aproposak diran ikuskizunak be badagoz aukeran: magia, ipuin kontalariak, zirkua, jantzak... Tailerretan, sukaldaritzea, eskulanak, bedarrak, buruhandiak eta magia landuko ditue.

Udaltegietako ekintzen osogarri, bost tailer be emongo ditue, online. Urtarrilaren 16an ipiniko ditue eskuragarri Ikusi eta Ikasiren webgunean (hemen). Ekimenaren maskotea dan Makusik gidatuko ditu lantegiok.

Jarduera guztiak edadearen arabera sailkatuta datoz, hiru moltso nagusitan. Nagusienek, 8 eta 10 urte bitartekoek, Lagun Artean izeneko programea dabe, euren gaitasunak eta sormena sendotzeko helburuduna. 4 eta 8 urte artekoentzat, Ikusi eta Ikasi Familian atala da aproposena, umeek eta euren familiek gozetako.

Barritasuna Ikusi eta Ikasi Altzoan da, 0 eta 3 urte bitartekoentzat. Jantzea eta olgetak ardatz, txikitxuenek euren familiakoakaz eta euskeraz gozau ahal izango dabe, hartu-emon afektiboak landu eta euskerea bizipen positiboakaz lotu deien.

Jarduera guztiak dobakoak diran arren, presentzialetan izena emon behar da aurretik, webgunean ipiniko daben inprimakiaren bidez. Urtarrilaren 16tik 31ra egongo da epea zabalik. Lekuak baino eskatzaile gehiago egon ezkero, zozketea egingo dau Udalak.