Euskerearen erabilerea sustatzeko hitzarmena sinatu dabe sei finantza erakundegaz

Bizkaie! 2022-03-16 12:11   Euskerea berbagai

Eusko Jaurlaritzako Kultura eta Hizkuntza Politikako sailak Bankoa Abanca, BBVA, Caixabank, Kutxabank, Laboral Kutxa eta Rural Kutxarekin euskararen erabilera sustatzeko eta kontsumitzaile eta erabiltzaileen hizkuntza eskubideak bermatzeko helburua duen hitzarmena sinatu dute.

Kultura eta Hizkuntza Politikako sailburu eta Eusko Jaurlaritzearen bozeroaile Bingen Zupiriak eta Bankoa Abankako Euskera Koordinatzaile Ana Urkiza, BBVA-ko Iparraldeko Lurralde zuzendari Carlos Gorriak, Caixabank-eko Negozio Arloko Zuzendari Igor Goienetxek, Kutxabank-eko Txikizkako Negozioaren zuzendari nagusi Eduardo Ruiz de Gordejuelak, Laboral Kutxako Personen Departamentuko zuzendari Iñaki Egizabal-ek eta Rural Kutxako Bizkaia eta Arabako erakunde saileko arduradun Iratxe Sainz-ek aurkeztu dabe hitzarmena Bilbon, Euskadiko Artxibo Historikoan egindako prentsaurrekoan.

Eusko Jaurlaritzearen Euskerea Eremu Sozioekonomikoan Sustatzeko 2020-2023 Planak eta XII. Legealdirako Gobernu Programeak euskerearen ezagutzea indartzeko konpromisoa zehazten dabe, batez be, euskerearen erabilerea azpimarratzea gizarte eta kultura eremuetan, eremu ekonomikoan, digitalean eta sektore publikoan. 123/2008 dekretuak, Konsumitzaileen eta erabiltzaileen hizkuntza eskubideei buruzkoak, barriz, herritarren hizkuntza eskubideen bermea jorratzen dau. Finantza erakundeei zuzenean eta zeharka eragiten deutse eta erakunde sinatzaileek bezero eta erabiltzaileei ahalik eta zerbitzu onena emotea eta hareen beharrak asebetetea dabe helburu eta euskerearen kudeaketa egokia eginez hurreratzen dira, besteak beste, helburu horretara. Finantza erakundeek gainera konpromisoa hartzen dabe parte hartzen daben edo babesten dituen ekintza eta egitasmoetan euskerearen presentzia sustatu eta bermatzeko.

Bilbon egindako prentsaurrekoan, Zupiria sailburuak adierazo dauenez, azken bost urtetan alkarren arteko jarraipen batzordeen maiztasuna ugaritu da eta akordioa barritzeko konpromisoa alkarregaz hartu genduanetik, 2021etik, lankidetzarako foroak ugaritu ditugu. Kultura eta Hizkuntza Politika sailak finantza erakundeakazko lankidetzea indartzeko, zerbitzu teknikoa jarri eban igaz martxan. Praktika onak konpartidu eta finantza entitateek dekretuaren betete mailea areagotzeko beharrezko dituen baliabideak erraztea izan da foro edo lan-talde honeen egitekoa.

Danetara, bost konpromiso nagusi hartzen ditue Eusko Jaurlaritzeagaz hitzarmena sinatu daben erakundeek:

1. Herritarren hizkuntza eskubideen alorrean alkarlana zehaztu eta egonkortzeko konpromisoa.

2. Euskerearen aldekotasuna adierazoten daben ekimenak sustatu eta horreetan parte hartzeko konpromisoa.

3. Finantza erakunde sinatzaileek konpromisoa hartzen dabe euren erakundeetan euskerearen erabilerea normalizetako plana egin eta bideratzeko. Orain arte planik izan ez daben finantza erakunde sinatzaileek, hasteko, egoerearen diagnostikoa eta plana egingo dabe.

4. Finantza erakunde sinatzaileak ahaleginduko dira, ahal dan neurrian, herrietako euskera zerbitzuakaz, UEMAgaz eta EUDELegaz lankidetzan lan egiten euskerearen erabilerea sustatzen ekimenei eta herritarren hizkuntza eskubideak bermatzeari jagokonez.

5. Finantza erakunde sinatzaileek bezeroakazko hartu-emonetan hizkuntza eskubideak bermatzen ahalegintzeko konpromisoa hartzen dabe.

Kultura eta Hizkuntza Politikako sailburu Bingen Zupiriak adierazo dauenez, hitzarmen barritu honek badau aurreko hitzarmenetik barrikuntza esanguratsu bat. Finantza erakunde guztiek hartu dabe konpromisoa euskerea euren erakundetan sustatzeko: barrura begira (lan hizkuntzea) nahiz kanpora begira (zerbitzu hizkuntzea). Eta horretarako, guztiek ala guztiek hartu dabe konpromisoa erakundean euskera plana egin eta garatzeko. Azpimarra handiena horretan egin nahi dau Eusko Jaurlaritzeak, uste baitogu euskera planak tresna ezin hobeak dirala hizkuntzak, euskerea eta gainerako hizkuntzak, modu planifikatuan kudeatuz zerbitzuaren kalidadea hobetzeko.

Eusko Jaurlaritzako Kultura eta Hizkuntza Politika sailak aholkularitza zerbitzua eskainiko deutse erakunde sinatzaileei euskera planak eta jarduerak planifikau deiezan. Helburua zerbitzuen eskaintza elebiduna  handitzea eta euskerea finantza erakundeetako lan hizkuntza moduan garatzea da.

Eusko Jaurlaritzeak 2007an hiru aurrezki kutxagaz sinatu eban lankidetza hitzarmena eta 2015ean bederatzi finantza erakundegazn. Gaur aurkeztu dan hitzarmena lau urterako egongo da indarrean eta aurrerantzean hitzarmenagaz bat egin nahi dauen beste edozein finantza erakundek be izango dau horretarako aukerea. Jarraipen batzorde bat arduratuko da hitzarmenaren jarraipena eta ebaluazinoa egiteaz eta Hizkuntza Politikako sailburuordetzeak jarritako zerbitzu teknikoaren bidez egingo da urtean urteko lan-plana, erakunde bakotxaren beharrei erantzuteko sortua.