Euskerearen Agenda Estrategikoa 2021-2024 aurkeztu dabe Eusko Legebiltzarrean

Bizkaie! 2022-03-02 12:39   Euskerea berbagai

Kultura eta Hizkuntza Politikako sailburu eta Eusko Jaurlaritzearen bozeroaile Bingen Zupiriak, Hizkuntza Politikako sailburuorde Miren Dobaranegaz batera, Euskararen Agenda Estrategikoa 2021-2024 aurkeztu dau Eusko Legebiltzarreko Kultura, Euskera eta Kirol batzordean.

Gobernu Kontseiluak 2021eko zemendiaren 2ko bileran onartu eban 2021-2024 epealdirako Euskerearen Agenda Estrategikoa, legegintzaldi honetako hizkuntza politikearen lan-iarloak zein helburu estrategikoak zehazten dituan dokumentua. Agiriak lau helburu estrategiko finkatu ditu euskerearen ezagutza zein erabilerea handitzen jarraitzeko, hizkuntza eskubideen bermean aurrera egiteko eta euskerearen lurralde guztietan erakundeen arteko lankidetzea sendotzeko.

Zupiria sailburuak adierazo dauenez, Euskerearen Agenda Estrategikoa euskerearen normalizazinoan aurrera egiteko baliabidea da Gobernuarentzat; euskerearen ezagutza areagotzeko eta euskerearen erabilerea indartzeko, gizarte aktibazinoa sustatuz arlo guztietan, euskerea erabiltea arau sozial normalizatu izan daiten. Baita zeharkako politika modura eragiteko tresnea be. Kultura eta Hizkuntza Politikako sailburuak gaineratu duenez, hizkuntza bizikidetzea gero eta orekatuago eregiten lagundu nahi dauen hizkuntza politikea irudikatzen dogu; euskerearen erabilerea gero eta eremu gehiagotan sustatuko dauena, lankidetzea oinarri hartuta, bai euskerearen esparruko eragileakaz, bai gainerako hizkuntza gitxituek dituen eragile askotarikoakaz be.

Euskerearen Agenda Estrategikoak bat egiten dau XII. legealdirako Gobernu Programeagaz, izan be, Gobernu Programan euskereari jagokonez ezarritako konpromisoak, bai eta bakotxa garatu ahal izateko ekimenak be, Agendearen oinarrian dagoz. Hona hemen 3 konpromiso nagusiak:

• Euskerearen ezagutza areagotzea eta, batez be, euskerearen erabileran eragitea gizarte eta kultura-eremuetan, eremu ekonomikoetan, digitaletan eta sektore publikoan.
• Hizkuntza eskubideen erabateko errespeturantz eta normalizautako hizkuntza bizikidetza baterantz aurrera egitea.
• Erakunde arteko lankidetzea indartzea euskerearen lurralde guztietan.

Konpromiso horreek lortu ahal izateko, Eusko Jaurlaritzeak lau helburu estrategiko onartu ditu Agendearen bidez.

1.      Herritarren euskerearen ezagutza handitzen jarraitzea.

• Helduen ikaskuntza-egitasmoa sendotzea.

 2.      Herritarren euskerearen erabilerea handitzen jarraitzea.

• Euskearen transmisinoa bermatzea.
• Aisialdian eta kirolean euskerearen erabilerea handitzea.
• Ingurune digitalean euskerearen erabilerea handitzea.
• Hedabideetan euskerearen erabilerea handitzea.
• EAEko sektore publikoan euskerearen erabilerea handitzea.
• Eremu sozioekonomiko publikoan zein pribatuan euskerearen erabilerea handitzea.

 3.      Herritarren hizkuntza eskubideen bermean aurrera egitea.

• Herritarren hizkuntza eskubideak bermatzea.

4.      Euskerearen lurralde guztietan erakundeen arteko lankidetzea sendotzen jarraitzea.

• Hizkuntza politikea garatzeko adostasunak lantzea.
• Erakundeen arteko lankidetzea indartzea.

Helburu horreek guztiak lortu ahal izateko, Eusko Jaurlaritzeak hainbat ekintza aurreikusi ditu: Euskerearen bilakaera soziolinguistikoaren adierazle nagusietan aurrera egiten jarraitzea da asmoa. Legegintzaldiaren amaieran, Agendearen betete maila neurtuko da.

Agendearen jarraipena egiteko Jarraipen Batzordea eratuko da eta ondoko kideak izango: Kultura eta Hizkuntza Politikako sailburua, Hizkuntza Politikarako sailburuordea, Hezkuntza sailburuordea, HABEko zuzendari nagusia, Etxepare Euskal Institutuaren zuzendaria, IVAPeko zuzendaria eta Eusko Jaurlaritzako sail bakotxeko ordezkaria (gitxienez zuzendari mailakoa). Era berean, partaide izango dira ondoko erakundeetako ordezkariak (gitxienez zuzendari mailakoak): Osakidetza, Justizia, Ertzaintza, EITB, Eustat eta Emakunde.